Accessibility links

шимбә, 10 декабрь 2016, Казан вакыты 12:00

Urayda da Qorban ğäyeten bäyräm ittelär


Sişämbe könne Azatlıq radiosınıñ Qazan byurosına Tömän ölkäseneñ Uray şähärennän Rida xanım Fäyzieva şaltırattı. Ul Tatarstan, Başqortstanda yäşäwçe Uray şähäre belän bäyle keşelärne Qorban ğäyete belän qotlarğa teläwen äytte. Ä andıy keşelär bu ike respublikada şaqtıy. Çönki salınğanına bıyıl äle nibarı 38 yılnı ğına tutıra torğan şähärne tözüdä küp kenä tatar-başqortlar qatnaşqan.



Xäzer dä 42 meñ Uray xalqınıñ öçtän ber öleşen tatar-başqortlar täşkil itä. Alar nigezdä neft tabu tarmağında eşläwçelär. Tatarlar monda şaqtıy aktiv milli tormış alıp baralar. Oçraşular, törle kiçälärgä xalıq bik teläp yöri. Uzğan yılnıñ cäyendä Urayda berençe märtäbä Sabantuyı da ütkän. Xäzerge waqıtta Läysän isemle cır ansamble dä oyışıp kilä. Bayançıbız ğına yuq, dip zarlana Rida xanım. Tatarstannan artistlar da yış qına kilä, xalıq konsertlarğa zallarnı tutırıp yöri ikän. Dini tormış ta onıtılmıy. Şähärdä xäzergä mäçet yuq, bügenge köndä anıñ äle nigeze genä salınğan. Älegä telägän keşegä ğibädät qılu urını bulıp 3 bülmäle ber fatir ğına xezmät itä. Uray möselmannarınıñ üz imamnarı da bar. Şuşı könnärdä alar da bar dönya möselmannarı belän bergä berençe märtäbä zurlap Qorban ğäyeten bäyräm itkännär. Bäyräm uñayınnan sıyır suyılğan, tabın äzerlänep, aş uzğan. Aşqa kilä almawçı yärdämgä moxtac millättäşlärebez dä öleşsez qalmağan. Bu eşlärneñ kübesen Uray şähäreneñ Duslıq isemle tatar-başqort oyışması citäkli. Duslıq äle küptän tügel genä eşli başlawına qaramastan, şaqtıy eş başqarğan. Xäzer oyışmanıñ eşçänlege, anıñ töp maqsatı turında Duslıqnıñ räise Rida xanım Fäyzieva söyli.



Bezneñ oyışma Duslıq dip atala. İseme cisemenä turı kilsen dip şulay atadıq inde, çönki bezdä tatar-başqortlar ğömer-ğomergä dus, tatu yäşäde. Bezneñ maqsatıbız – milli mädäniätebezne, ğöref-ğädätlärebezne saqlap qalu. Awırlıqlar da yuq tügel, läkin bergä-bergä eşlägändä böten närsäne oyıştırıp bula. Matdi yaqtan bulışuçılar bik küp tügel, alay da här çarağa yärdäm qulı suzuçılar tabıla. Bezdä xäzerge köndä dini kurslar eşläp kilä. Läkin älegä tatar tele öyrätelmi. Xäyer, inde tizdän bu eşne dä başlap cibärerbez. Däreslär alıp barırğa urın birelde, uqıtırğa uqıtuçıbız da bar



Şulay itep, tizdän Uraydağı millättäşlärebez dä tatar telen öyränä alaçaqlar. Älege eşne oyıştıruda şaqtıy ğına yärdämne Qazannan kürdek, anda soñğı baruımda, däresleklärgä dä zakaz käğäzlären alıp qayttım, di Rida xanım. Ğomumän, anıñ süzlärenä qarağanda, Uray tatarları Tatarstan belän tığız elemtädä toralar, Qazannıñ yärdämen toyıp yäşilär. Häm kiläçäktä bu elemtälärneñ nığıy ğına baruına ömetlänälär.



Gölnaz İlgizär

XS
SM
MD
LG