Accessibility links

якшәмбе, 4 декабрь 2016, Казан вакыты 01:01

Qazan oçqıçları - Yıraq Şärıq kügendä


Atna urtası ğädättägeçä räsmi xäbärlärgä bik bay bula. Bu yulı da iskärmä tügel. 4nçe fevral könne Tatarstan prezidentı Gazprom şirkäte citäkçese Aleksey Miller belän oçraştı. Mintimer Şäymiev anda Tatarstanğa cibärelä torğan gaznıñ külämen arttıru turında söyläşte. Ä respublikanıñ parlament räise Färit Möxämmätşin citäkçelegendäge delegatsiä Penzağa kitte. Alar anda ölkäneñ 65 yıllığına bağışlanğan bäyräm çaralarında qatnaşalar. Sişämbe könne isä Qazan kremlendä Tatarstannıñ İtaliä belän üzara xezmättäşlekne arttıru turında söyläştelär. Älege söyläşü Mintimer Şäymievneñ Teknimont firması citäkçese Rozario Alessandro belän bulğan oçraşuında bardı. Ayırım alğanda, bu firma respublikanıñ neft eşkärtü tarmağında zamança texnologiälär kertügä yärdäm itäçäk. KamAZ şirkäte citäkçelege dä üzläre citeşterä torğan maşinalarnı yaxşırtu östendä eş alıp bara. 3nçe fevral könne şirkät wäkilläre Amerikanıñ Kaminz korporatsiäse wäkilläre belän oçraşuı uzdı. Anda süz KamAZ avtomobilläre öçen dvigatellär turında bardı.

Tatarstannıñ aviatsiä xezmätkärläre dä üzläreneñ eşçänlegen arttıralar. Ğomumän alğanda, 2004nçe yılda respublikanıñ saqlanu sänäğätendä xäl iteläse problemalar kimergä tieş. Bu xaqta Tatarstannıñ iqtisat häm sänäğät ministrı urınbasarı Sergey Muxin belderde. Tatarstan aviatözüçelärenä kilgändä, 2004nçe yılda alar tarafınnan tözelgän 3 TU-214 oçqıçı Finans-lizing kompaniäsenä tapşırılaçaq. 1997nçe yılda oyıştırılğan älege kompaniä törle sänäğät tarmaqlarındağı kileşülärne finanslıy. 2007nçe yılda bu kompaniägä Qazannıñ Gorbunov isemendäge aviatsiä şirkätendä cıyılğan 10 oçqıç tapşırılır, dip kötelä. Busı äle kiläçäktä. Ä xäzerge köndä isä tatarstanlılar eşlägän yaña TU-214 oçqıçlar inde küklärdä oça. Äytergä kiräk, älege oçqıçlar xäzerge köndä Rusiädä tözelä torğan samoletlar arasında iñ yañalardan häm yaxşılardan sanala. Şuña da qaramastan, TU-214 tikşerülär ütep, litsenziä alsın öçen federal xökümätneñ aqçası tabılmadı. Bu eşne Tatarstan finanslap, 200 million sum aqça birde. Anıñ qarawı, xäzerge köndä Qazan aviatsiä şirkätlärendä eşläwçelär eşsez utırmıy, ä alar tözegän oçqıçlar, mäsälän, Yıraq Şärıq küklärendä oça. Anda Qazannan inde öçençe oçqıç ozatıldı. Alar äybät kenä eşläsä, Dal’avia şirkäte Qazannan tağın 5-6 oçqıç alırğa niätli.

XS
SM
MD
LG