Accessibility links

чәршәмбе, 7 декабрь 2016, Казан вакыты 15:44

Azärbaycan prezidentı İlham Aliev Mäskäwgä kilde. İke il arasındağı mönäsäbätlär nindiräk?


Azerbaycan prezidentı İlham Aliev , Russiä prezidentı Putin häm yuğarı däräcädäge başqa räsmilär belän söyläşülär öçen öç könnek räsmi vizit belän Mäskävgä kilde. Küzätüçelär vizit Mäskäv belän Baku arasındağı çılı mönäsäbätlärne tağı da nığıtaçaq dip kötälär. Azerbaycannıñ yaña citäkçese dä ätise Heydar Aliev kebek ük ber yaqtan Russiä häm ikençe yaqtan AQŞ belän mönäsäbätlärdä balans totarğa tırışa.

Şuşı vizit vaqıtında altı kileşügä, şul sanda ikeyaqlı mönäsäbätlärne üsterügä qarağan Mäskäv Deklaratsiäsenä qul quyılaçaq. Aliyev bu atnada RİA Novestig birgän ängämäsendä ike il arasındağı mönäsäbätlär, SSSR tarqalğannan soñğı çordağı iñ yuğarı däräcädä dip belderde. Läkin, Aliev tışqı säyäsättä tik Mäskävgä genä tayanmıy. Ul ätise kebek ük regiondağı başqa illär AQŞ, Törkiä häm İran belän dä yaxşı mönäsäbät totu säyäsäten alıp bara. Yäş Aliev tışqı säyäsättä Azerbaycannıñ milli mänfäğätlärenä berençel urın birergä väğdä itte. Bakudağı bäysez Strategik Xezmättäşlek buyınça Euroasia Fondı räise Reşat Rezaqulievneñ süzlärençä, İlham ätise yulınan baraçaq, ber yaqtan AQŞ, ikençe yaqtan Russiä häm İran belän mönäsäbätlärdä balans totarğa tırışaçaq.

Audio

Azerbaycan üz territoriäsendäge Russiäneñ Qabala xärbi radar qorılması buyınça Mäskäv belän bäxäsne xäl itte, Rus şirkätlärenä energiä bazarın açtı häm üzendä sıyınğan çeçen separatistlarına qarşı da çaralar kürä. Bakudağı bäysez küzätüçe Elhan Nuriyev , Alievneñ Mäskäv vizitı ike arasındağı mönäsäbätlärne tağı da küberäk yaxşırtaçaq, nığıtaçaq digän fikerdä.

Audio

Läkin, söyläşülärdä çeterekle ber mäsäläneñ dä kütärelüe ixtimal. Ul da bulda Washingtonıñ Baku-Tbilisi-Ceyhan nefteütkärgeçen saqlau öçen anda AQŞ yäisä NATO xärbilären urnaştırırğa tırışu ixtimallığı. AQŞ generalı Çarls Wald berniçä ay elek bu mäsäläne quzğatqan ide. Läkin, İlham Aliev Mäskävgä vizitı aldınnan moña qağılıp , bu mäsälä Azerbaycannıñ tışqı politikasınıñ köntärtibendä tormıy dip belderde. Anıñ süzlärençä, Baku mänfäğät urtaqlığı bulğan mäsälälärdä zur dävlätlär belän xezmättäşlek itä, bulmasa itmi ikän. Läkin, Rezaqulievneñ fikerençä, bu mäsälä äle yabılmağan.

Audio

Älbättä, Mäskäv söyläşülärendä Taulı qarabax konfliktı da telgä alınaçaq. Aliev uzğan ayda Yevropada İminlek Häm Xezmättäşlek Oyışmasın qänğätlänerlek tınıçlıq planın täqdim itmäven tänqitläde. Azerbaycan mätbuğatında aradaşçı Mink törkeme ağzası bulğan Mäskäv yaña plan täqdim itkän digän xäbär taraldı. Läkin, anıñ eçtälege mäğlüm tügel häm Rezaquliev bu xaqta törle spekulativ fikerlär yüri dip belderde.

Audio

Politik küzätüçe Elhan Nuriyevneñ fikerençä, 80-nçe yıllarnıñ azaqlarında Azerbaycan-Ärmänistan bäxäseneñ qabınıp kitüendä rol uynağan Russiä, Erivan belän yaqın xärbi häm politik elemtä tota häm anıñ bu regionda üz küntärtibe bar. Şuşı köntärtibe isä AQŞ häm Azerbaycannqına turı kilä dip äytep bulmıy. Şulay da Mäskävneñ üz iminlege säbäple Qarabax bäxäsen tınıç yullar belän xäl qıluğa äleş kertüe mömkin.

Audio

Nuriyevneñ fikerençä, Kremlneñ Azerbaycanda totrıqlılıqnıñ buluı belän qızıqsınuın, anıñ prezident saylaularınnan alda uq İlham Alievne yaqlap çığuı da kürästä.

Färit İdelle, Praga.
XS
SM
MD
LG