Accessibility links

Кайнар хәбәр

... aldınğılarnı saylıylar säwit apparatına (sovet çorı cırınnan)


Pänceşämbe räsmi xäbärlärendä Tatarstan Üzäk saylaw komissiäse tağın 3 säyäsi firqäne häm ber bloknı. Yaña terkälgän “Rossiyskaya kommunistiçeskaya raboçaya partiä-Rossiyskaya partiä kommunistov”nıñ töbäk bülege Däwlät Şurası saylawlarına nämzätlär isemlegen iqtisatçı Rif Zarifullin başlıy. Şuşı uq isemlektä elekkege Dumadağı iñ millät pärvär deputatıbız Fändäs Safiullin da bar. “Razvitie predprinimatel'stva” firqäseneñ töbäk bülege isemlegen İvan Graçev başlıy. İvan Graçev şulay uq Rusiädä tanıluğa ireşkän säyäsätçe. Elekkege Duma deputatı. Şulay uq pänceşämbe könne terkälgän “Partiä rossiyskix regionov” firqäse bülegeneñ isemlegen Tatarstan hönärilär berlege citäkçeläreneñ berse Yuri Proxorov başlıy. İkençe bulıp şağir Renat Xaris bara. Dürtençe terkälüçe – soñğı waqıtta bik populyarlaşıp kitkän “Rodina” saylaw bloğı. Bu bloknıñ Tatarstan bülege isemlegendä 15 keşe. İsemlektä berençe bulıp “Zvezda Povolj'ya” gazetası möxärrire Räşit Äxmätov bara. Şulay itep, bulaçaq parlamentta firqälärgä häm säyäsi xäräkätlärgä birelgän 50 urınğa 8 säyäsi firqä häm 1 saylaw bloğı däğwä itä. Alarnıñ isemleklärendä 187 nämzät. Ber mandatlı okruglardan saylanası 50 urınğa 126 nämzät terkälgän. Häm menä şuşı sannar inde üzgärmäs dip sanala. Çönki 7nçe fevral'dä nämzätlärneñ räsmi terkälü möddäte çığa. Şuña kürä inde räsmi dairälärdän saylaw aldı kampaniäse başlanuğa xäyer-fatixa da işetelä başladı. Jurnalistlar berlege räise Rimma Ratnikova “Tatarstan yaña ğasır” televizion kanalında saylaw aldı kampaniäsendä jurnalistlarnı korrekt bulırğa, nämzätlär turında pozitiv materiallar kübräk birergä çaqırdı.

Pänceşämbe könne premyer-ministr urınbasarı Zilä Wälieva şulay uq jurnalistlarnı saylaw aldı kampaniäsenä pozitiv qararğa öndäde. Ğäyre räsmi çığanaqlardan belengänçä, däwlät teleradiokanallarınıñ möxärrirlärenä saylaw aldı kampaniäse barışında ğäyre räsmi räweştä negativ birmäskä, pozitiv materiallar ğına birergä kürsätmä birelgän.

Läkin tormış – tormış bit ul. Pozitiv yünäleştä genä barmıy. Pänceşämbe könne räsmi mäğlümat çaraları Qazanda “Vodokanal” munitsipal' idäräneñ general' direktorı Grigoriy Arutyunov atıp üterelde dip xäbär ittelär. G.Arutyunov irtänge säğät 7 yortınnan çığıp barğanda ber atudan üterelgän. Xäzergä tikşerü mänfäğätlärendä täfsille mäğlümatlar häm bernindi kommentariylar da birelmi. Respublika prokuraturası tikşerügä kereşte. Şulay da bu cinayätneñ yallap üterü buluına qayber farazlar bar. Küptän tügel eşmäkärlärneñ zur kiñäşmäsendä “Vodokanal”, eşmäkärlär tözegän binalarğa, ofislarğa su ütkärgeçlärgä totaşu öçen üti almaslıq, äytik, fälän kilometr şähär çeltären tözätü- digän şartlar quyğanı öçen kisken tänqitlände. Ğäyre räsmi çığanaqlar mondıy şartlarnıñ gel şähär qaznası faydasına ğına bulmawına da imeş-mimeşlär yörüen raslıylar.

XS
SM
MD
LG