Accessibility links

чәршәмбе, 7 декабрь 2016, Казан вакыты 21:32

Apasta yasalma boz mäydançığı bulaçaq


Bilgele bulğança, soñğı yıllarda Apas rayonı xokkeyçıları küp kenä uyınnarda Respublikanıñ başqa komandaların ciñep kildelär. Sport sarayın tözü fikere dä apaslılarda şuşı uñışlardan soñ tuğan. Maxsus şunıñ öçen “Apas xokkey klubı” digän ictimaği oyışma da tözelgän. Anda kübräk eşquarlar kergän. Anıñ räise eşmäkär Färit Fäyzullin bu xaqta menä närsälär söyläde:

Apas komandası inde dürt yıl xokkey belän şöğellänep kilä. Häm bez tiz arada Respublikadağı awıl komandaları arasında aldınğı urınnarnı ala başladıq. Şuña komandağa da “Lavina” digän isem dä birdek. Törle bozlarda uynağaç, nişläp äle üzebezgä dä tözemäskä dip uzğan cäy korobkanıñ östen häm qırıyların yaptıq. Şulay itep 4nçe fevral'dä açılışı buldı.

Äytergä kiräk, bügenge köndä Apasta yäşägän 23 meñnän artıq xalıqnıñ 40 protsentın yäşlär täşkil itä. Şuña kürä yaqın kiläçäktä älege sport sarayınıñ yanında yasalma boz quyılğan tağın ber yaña mäydançıq bulaçaq ikän. Respublika citäkçelege dä bu eşkä yärdäm itärgä wäğdä itkän. Läkin yasalma bozlı mäydançıq tözelgändä cäncallar bulmıy qalır dip ömetlänäse kilä. Çönki xäzer safqa basqan Sport sarayı eşlängändä eşmäkärlär belän rayon xakimiäte arasında beraz bärgäläşü bulıp alğan ide. Bu xaqta “Efir” telekompaniäseneñ “Respublika” tapşıruı Apasqa kilep töşerep, şaqtıy täfsille syujet ta äzerläde. Ämma “Efir” Apasta kürsätmäw säbäple, rayon xalqı bik qızıqsınsa da tapşırunı kürä almadı. Färit Fäyzullin bu mäs'älä turıda üze menä närsälär söyli:

“Bezgä dekaber başında TR Premyer-ministrı Röstäm Miñnexanov kilde. Häm bezgä 10 million sum aqça wäğdä itte. Ber atna da un köndä ul aqça bezgä kilde. Läkin aqça kilgäç xokkey klubı kiräkmi bulıp çıqtı. Şunnan rayon xakimiäte belän beraz konflikt bulıp aldı”.

Äytergä kiräk, Sport sarayı 2 million 200 meñ sumğa töşkän. Başlanğıç çorda tözüçe oyışmalar nıq yärdäm itkän. Qısqası, kiläçäk buın öçen barısı da bulırğa tieş dip eşlägän apaslılar. Sport sarayın açqanda Apas xakimiäte başlığı Azat Xänifatullin “Yäşlär kübräk sport belän şöğellänsä narkomaniä häm başqa çirlär turında dokladlar äzräk söylärgä turı kiler ide", - dip äytüen yaza “intertat.ru” elektron gazetası.

Respublika citäkçelege dä häryaqlap yärdäm itärgä äzerlegen kürsätkän. Sport sarayın açqanda TR Yäşlär eşläre häm sport ministrı Marat Bariev ministrlıqnıñ yasalma boz mäydançığın tözergä bulışaçağın beldergän. Älege eşkä inde bıyılnıñ cäyendä ük totınırğa uylap toralar.

Landış Xarrasova.

XS
SM
MD
LG