Başqortstanda xökümätneñ yaña sostavına kemnär kerüe, nihäyät, açıqlanıp bette şikelle. 5 fivral könne respublika prezidentı Mortaza Räximov 22 keşedän torğan yaña xökümätne raslaw turında maxsus färmannı imzaladı. Anda ministerlardan tış, qayber däwlät komitetları räisläre dä, Ufa şähäre xakimiatı başlığı Pawel Qaçqayıv ta, başqa qayber citäkçelär dä kergän.
Älegä qadär republikanıñ yäşlär eşläre buyınça komitetı citäkçese täğäyenlänmägän ide. 5 fivraldağı ikençe ber färmanı belän bu wazifağa respublika prezidentı 28 yäşlek Ramil Xisametdinovnı bilgeläde. Soñğı ike yılda ul Ufadağı «Altın ay» isemle şirkät direktorı urınbasarı bulıp eşlägän. Şunısı diqqätne cälep itä – Ramil Xisametdinov respublika xökümäte başlığı Rafael Baydäwlätovnıñ awıldaşı ikän. Alar ikese dä Belorets rayoınınıñ Usmanğäli awılınnan.
Republika citäkçeläre tuğan rayonnarın häm tuğan awılların gel iğtibar üzägendä genä tota. Äle menä 6 fivral könne dä Mortaza Räximov belän Rafael Baydäwlätov, parlaşıp, premiernıñ tuğan yağı – Beloret rayonına bardı häm anda yaña binalar, yaña küperlär häm yullar faydalanuğa tapşıruda qatnaştı, yänä qızıl tasmalar kisep yörde.
Ä 7 fivral könne prezident Räximov üzeneñ 70 yäşlek yübileyen bäyräm itä. Şuşı uñaydan bu atnada respublika waqıtlı matbuğat basmaları ilbaşın maqtap küp kenä yazmalar bastırdı.
