Accessibility links

Кайнар хәбәр

Ğiraq kontraktların tanışlıq belän aluda, rişwät birüdä ğäyeplängän Halliburton aqlanu kampaniäsen başladı


Amerikanıñ Halliburton korporatsiäse Ğiraqta tözekländerü eşlärenä baş şirkät itep saylanğan ide. Vitse-prezident Dick Cheney''ğa bäyle bu şirkät kontraktların tanışlıq belän aluda, rişwät birüdä ğäyeplänä. Tap töşkän isemen ağartu maqsatı belän Halliburton televideniedä reklam kampaniäse başlap cibärde.

Halliburton şirkäteneñ amerikan televideniesendä äyländerelgän reklam-tasmalarnıñ berse qorurlıq xisläre uyatqan muzıka belän başlana. Şirkätneñ xäzerge citäkçese David Lesar, "bez Ğiraqtağı kontraktlarnı tanışlıq belän tügel, ä eşne belüebez arqasında aldıq" dip ışandıra:

Audio (David Lesar)

"Tänqit ul xata tügel. Bezneñ xezmätkärlär zur eş başqara."

1995-2000 yıllarda Halliburtonnı vitse-prezident Dick Cheney citäkli ide. Ul äle dä şirkättän tüläwlär alıp tora. Tänqitçelär äytüençä, Ğiraqta 2 milliard dollar külämendä kontrakqlarnı Halliburton ğädel bäyge näticäsendä tügel, ä şul tanışlıq arqasında alğan. Monnan tış şirkät Nigeriädä kontraktar alu öçen ilneñ türälärenä 180 million dollar rişwät birüdä ğäyeplänä. Bu eşne xäzer Yustitsiä ministrlığı tikşerä.

Şirkät citäkçeläre bu ğäyepläwlärne säyäsät, noyäber ayında ütäse saylawlarda Bushnı bärep töşerergä telägän demokratlarnıñ eşe, dip atıy. Üz abruyın saqlaw öçen Halliburton televideniedä reklam kampaniä başlap cibärde. Tik monıñ faydası bulırmı? "Üseş klubı" dip atalğan ğäyre-räsmi oyışma citäkçese Stephen Moore, faydası bulır dip sanıy:

Audio (Stephen Moore)

"Soñğı 3 yılda Halliburtonğa küp pıçraq atıldı, ul Amerikanıñ korrupsiä tamğasına äylände, bu PR aña aqlanırğa, investor-mäştärilär aldında yözen saqlarğa yärdäm itäçäk."

PR kampaniägä küpme aqça kitkänder, bilgesez, reklam-tasmalar kiçke sägätlärdä, iñ qimmät waqıtta kürsätelä. Halliburton citeştergän tawar tügel, şirkät üze telgä alına, bu – otışlıraq alım.

Tağın ber belgeç, Washington universitetınıñ xoquq professorı Lawrence Mitchell, Halliburton tiräsendäge xällärneñ säyäsät belän bäyle buluı belän kileşä, läkin monıñ öçen şirkät üze ğäyeple, di ul:

Audio (Lawrence Mitchell)

"Monıñ säyäsät ikäne bilgele. Ğiraq suğışın xuplağan vitse-prezident - Halliburton keşese. Salım tüläwçelärneñ aqçası xäzer Ğiraqqa kitä. Mondıy eşneñ kiñ cämäğätçelekkä çığarıluwı tabiğıy xäl."

Ämmä Mitchell fikerençä, bu reklam kampaniäneñ şirkätkä faydası az bulaçaq. Amerikannarnıñ kübese Halliburton turında berni belmi. Belgännäre - bu tasmanı qarap qına fikeren üzgärtmiäçäk. Ägär inde Halliburton eşe saylaw aldı kampaniäseneñ ber öleşenä äylänsä, başqa xäl. Ul çaqta reklamğa salınğan aqçanı aqıllı investitsiä dip atarğa bula.

Ali Gilmi, Praga
XS
SM
MD
LG