Accessibility links

дүшәмбе, 5 декабрь 2016, Казан вакыты 07:33

Putinne kisken tänqitläwçe häm prezidentlıq öçen köräşkän İvan Rıbkin äle haman da tabılmadı


Rusiädäge prezident saylawlarına ber ay çaması ğına waqıt qalıp barğanda aña äzerlek säyer waqiğä belän bilgelände, xörmätle tıñlawçılar. Xäzerge prezident Vladimir Putinneñ iñ ayawsız köndäşe bulır dip kötelgän, anıñ säyäsäten kisken tänqitlägän İvan Rıbkinneñ uzğan atnakiçtän birle qayda buluı mäğlüm tügel. Anı ezläw eşen Mäskäw militsiäse häm Federal'' iminlek xezmäte alıp bara.

Mäğlüm magnat Berezovski belän bäyle İvan Rıbkinneñ saylawlarğa ber ay qalğanda kinät yuğaluı üze ük ber säyer waqiğä bulsa, düşämbe könne monıñ tiräsendä tağın da säyerräk xällär küzätelde. Rıbkin ğailäseneñ anıñ yuğaluı xaqında belderüe näticäsendä Mäskäwdäge Presnya prokuraturası "añlı räweştä üterü" eşen açıp cibärüe xaqında iğlan itte. Rusiädäge xoquqi praktika şundıy ki, ägär dä kem dä bulsa yuğalıp añardan 3 kön däwamında xäbär alınmasa andıy cinayät eşe üzennän-üze açıla. Läkin küp tä ütmäde säyer xällärne däwam itep prokuratura cinayät eşe açu turındağı qararın köçtän çığardı häm "älegä monıñ öçen citärlek nigez yuq" dip belderde. Añlaşıla ki, bernindi dä dälillär bulmıy torıp aldan uq üterü ğäyepläwe belän cinayät eşe açu beraz ğäcäpländerä, soñraq prokuraturanıñ aldağı qararın üzgärtüe bälkem şuña da bäyläder. Läkin iğtibarnı şul cälep itä - Rusiä prokuraturası Rıbkinneñ yuğaluı uñayınnan üterü ğäyepläwe belän genä tügel, ğomumän, nindi dä bulsa cinayät eşe açunı irtäräk dip sanıy. Xatını Albina süzlärenä qarağanda, İvan Rıbkinne inde pänceşämbe kiçennän birle kürüçe bulmağan. Başta anı yazlıqqa kitkänder dip uylağannar, ezläw barı tik, andağı saqçı şaltıratıp telefonğa Rıbkinne çaqırğannan soñ ğına başlanğan. Şunda uq Rıbkinneñ ike maşinası da öydä qaluı açıqlanğan. Şimbä könne Rusiäneñ Üzäk saylaw komissiäsendä prezidentlıq öçen köräşäçäk qayber nämzätlärgä, şul isäptän Rıbkingä dä, terkäw turında tanı

qlıq tapşırıldı, läkin Rıbkin anda da qatnaşmadı. Komissiä räise Aleksandr Veşnyakov süzlärenä qarağanda, tawış birü könenä qädär tabılmasa da Rıbkinneñ iseme nämzätlär isemlegennän alınmayaçaq. Ä menä saylawaldı debatlarında qatnaşu belän wäzğiat beraz qatlawlıraq. Qanunda, alarda barı tik nämzät üze genä qatnaşa ala dielgän, ike çığarma oçrağında ğına - ägär dä ul xasta bulsa, yäisä töp eşe säbäple qatnaşa almasa - anı ışanıçlı wäkile belän almaştıru röxsät itelä. Rıbkin oçrağı bolarnıñ bersenä dä turı kilmi. Berniçä kön elek ul matbuğatta, arzan dan qazanu maqsatında törle oligarxlar belän köräş alıp barğan xäzerge prezident Putin üze iñ zur oligarx bulıp tora, anıñ zur aqça ağımnarında utırğan häm isemnäre kiñ cämäğätçelekkä bilgele bulmağan üz kassirları bar dip beldergän ide. Rusiä xalqı xäzer gazetalarnı küp uqımıy, mäğlümatnı kübräk däwlät qulındağı, dimäk xakimiat öçen genä uñay xäbärlär birgän televideniä aşa ala. Terkälep teledebatlarda qatnaşqan oçraqta İvan Rıbkin üz ğäyepläwlären kiñ cämäğätçelekkä citkerä ala ide. Yuğalunı ul üze oyıştırğandır, çönki bu aña üze tiräsendä şaw-şu quptarıp östämä yaqlaw kiterä ala digän qaraş ta belderelä. Bu uñaydan yazma azağında, İvan Rıbkinneñ saylawaldı eşlären citäklägän Kseniä Ponomareva süzlären kiterep bula. Düşämbe könne Mäskäwdä ul Rıbkinneñ yuğaluı xaqında bolay dip belderde.

Audio, Kseniä Ponomareva

Kärim Kamal, Praga
XS
SM
MD
LG