Accessibility links

якшәмбе, 11 декабрь 2016, Казан вакыты 15:00

Mintimer Şäymiev mäskäwlelärneñ qayğıların urtaqlaştı


Tatarstan prezidentı Mintimer Şäymiev Yuriy Lujkov isemenä telegramma cibärep, mäskäwlelärneñ metroda bulğan şartlaw näticäsendä kiçergän yuğaltuları uñayınnan alarnıñ qayğısın urtaqlaştı. Terrorizmnı, teläsä nindi mäs’äläne köç belän xäl itüne Tatarstanda yaqlamıylar.



Düşämbe könne Tatarstannıñ Yäşel Üzän rayonı häm şähäre deputatlarınıñ sessiäse buldı. Anda oyıştıru mäs’äläläre qaraldı. Moña qädär xakimiät başlığı bulıp eşlägän Rawil Zinnätullin başqa eşkä kitü säbäple wazifalarınnan azat itelde. Deputatlar Tatarstan prezidentınıñ bu qararın raslağaç, Yäşel Üzängä yaña xakim saylandı. Prezident bu wazifağa moña qädär Yar Çallı şähäre xakimiät başlığınıñ berençe urınbasarı Yemel''yanov Gennadiy Yegoroviçnı täqdim itte. Deputatlar älege kandidaturanı xupladı. Dimäk, prezident anı bilgeläw turındağı ukazğa imza quya. Gennadiy Yemel''yanovqa 47 yäş. Uzğan yılda, Çallı xakime Räşit Xamadiev wafat bulğaç häm, şulay uq, köz aylarında Çallınıñ yaña citäkçese däwalanğanda, ul şähär xakimiäte başlığı wazifaların başqarıp tordı. Şulay itep, Yäşel Üzängä zur şähär belän idärä itü täcribäse bulğan Gennadiy Yemel''yanov quyıldı. Mondıy zur urınğa tatar kadrları ğädättä yışraq tabılğanğa, älege mäs’äläne xäl itkändä citäkçeneñ milläte dä isäpkä alınğandır. Xäzer kadrlar belän şöğellätüçelär deputatlar häm xakimiät başlıqları arasında milli balans buldırırğa tırışalar.



Şimbä könne Tatarstan—Yaña ğasır xäräkäteneñ säyäsi Şurası kiñäytelgän tırış ütkärde. Anda Rusiä Duması saylawlarına yomğaqlar yasaldı, martta ütäçäk saylawlarğa plannar bilgelände. Tatarstan—Yaña ğasır Rusiä prezidentın saylağanda Vladimir Putinnı yaqlayaçaq häm Berdäm Rusiä firqäsenä yärdäm itäçäk. 14nçe martta bulaçaq Däwlät Sovetın saylağanda Tatarstan—Yaña ğasır şul uq firqä belän qulğa-qul totınıp eşläyäçäk. Başqaça bula da almıy, çönki Yaña ğasır xäräkäte häm Berdäm Rusiäneñ Tatarstan bülegendä nigezdä ber ük keşelär eşli. Utırışta Färit Möxämmätşin şaqtıy qızıqlı ber fiker äytte. Tatarstan—Yaña ğasır saylaw waqıtında mäğlüm firqä belän bergä barsa da, respublikanıñ Däwlät Sovetına kergäç, anıñ deputatları ayırım fraksiägä berläşäçäk ikän. Möxämmätşin fikerençä, iñ kimendä unlap deputat Yaña ğasırçı bulıp kitäçäk.



Rimzil Wäli

XS
SM
MD
LG