Accessibility links

пәнҗешәмбе, 8 декабрь 2016, Казан вакыты 09:04

Nijğarda ölkä tatar milli-mädäni avtonomiäse oyıştırıldı




Başqa töbäk tatarlar kebek uq, Nijğardağı milläşlärebez dä, zamanında berniçä milli oyışma tözep, millät üseşe öçen törle-törle yünäleştä eş alıp bardı. Marat Yunisov citäkçelegendäge «Tuğan yaq» oyışması eşläde, Firdäüs Wahapova tırışlığı belän «Yaqtaşlar» cämğiäte tözelde, Umär xäzrät İdrisov başlanğıçında, diniä näzaräte dä, islam ruxında tärbiä alıp bardı. İnde xäzer Nicğar tatarları berläşergä uyladı.

7nçe fivral’dä, Tübän Novgorodnıñ cämiğ mäçetendä ölkä milli-mädäni avtonomiäsen oyıştıru konferensiäse ütte. Ä aña qädär, Dzerjinskiy qalasınıñ möselman tatarları şähär avtonomiäsen oyıştırğan ide häm, Nijgar tatarları da, üzlärneñ cirle avtonomiäsen baldırğan bulğan.



Ölkä milli-mädäni avtonomiäsen da şuşı cirle oyışmalar, «Tuğan yaq» häm «Yaqtaşlar» oyışması, diniä näzaräte wäkilläre dä oyıştırırğa uyladı. Här oyışmada üz cıyılışı ütep, oyıştıru konferensiäsenä wäkillär bilgelände, täqdimnär kertelde.



Ölkä avtonomiäsen oyıştıru konferensiäse şähärdä möhim waqiğa äylände. Anda Tübän Novgorod ölkäse xökümäte, qanun çığaru oyışması wäkilläre, kürenekle ğalimnär, eşmäkärlär, mäğlümat çaraları wäkilläre kilde.



Berençe itep, Nijğar şähäre häm ölkäse diniä näzaräte räise Umär xäzrät İdrisov çığış yasadı. Ul cämğiätneñ dini-äxlaqi problemalarına qağıldı, tatar zıyalıların dini häm milli eşlärdän çittä tormasqa çaqırdı. Annan soñ, «Tuğan yaq» oyışması räise Marat Yunisov çığış yasap, regional’ avtonomiä räise itep, Dzerjinskiy imamı häm cirle avtonomiä başlığı Gayaz xäzrät Zakirovnı saylağra täqdim itte. Ul küpçelek tawış belän saylandı da.



Qazan qunağı Röstäm äfände Ğäynetdinov Bötendönya tatarları kongressı isennän çığış yasadı. Ul, 70 meñläp tatar yäşägän Nicğar ölkäsendä, tatar mäktäbe bulmawına ükeneç belderde.



Soñınnan Qazan qunağı konferensiägä kilgän qanun çığaru cıyılışı başlığı Evgeni Lyulinğa tübätäy kidertte. Ölkä parlamentı başlığı da älege konferensiäsendä çığış yasadı häm tatarlarnı avtonomiä oyıştıru waqiğası belän qotladı. Gubernator isemennän täbrik käğäzen, ölkä xakimiätendä milek ministrı bulıp eşlägän, tatar keşese Damir Fatixov uqıp birde.



Konferensiä tämamlanğannan soñ, ölkäneñ törle şähärlärennän cıyılğan millättäşlärebez, «Timer yulçılar» Mädäniät sarayında bäyräm konsertın qaradı.

Bikä Timerova, Tübän Novgorod.

XS
SM
MD
LG