Accessibility links

җомга, 9 декабрь 2016, Казан вакыты 05:01

Sember ölkäsennän soñğı yañalıqlar


Sember qalası başlığı Pavel Romanenko Ölkä byudejetı proyektın sudqa birde, çönki bu proekt Munitsipal' berämleklärneñ finans nigeze turındağı qanunğa qarşı kilä. Өlkä başlığı Vladimir Şamanov, Qanunnar çığaru cıyılışı räise Boris Zotov häm Baş federal' inspektor Aleksandr İvanov dikäberdä uzğan saylawlarda “barısına da qarşılar firqäse”neñ ciñep çığuı 14-martta da qabatlanmasın öçen tieşle çaralar kürergä tırışalar. Şamanov fikerençä, saylawlanıñ tağın da uñışsız uzuı ölkäneñ Mäskäw belän mönäsäbätlären bozaçaq, ä bu isä baytaq strategik burıçlarnıñ ütälüenä qomaçawlıq tudıraçaq.

İt kombinatı, şikär zavodı, “Spirtprom” kebek keremle şirqätlär artınnan “Ptitseprom”nı da Mäskäw qulına üçerü waqıtı kilep citte kebek. Anda açlıqtan 150 meñ tawıqnıñ ülüe bu şirqätne bankrot yasarğa citärlek dälil. Äytergä kiräk, yaxşı ğına eşläp kilgän qoş fabrikların polkovnik Şevçenko qulına küçerep, anda xärbilär xaqimlekkä kilgäç başlandı mondıy bälalar.

Danlıqlı 31-hawa-desant brigatı cinayätlärdän mantıy almıy. Bu “elitnıy” xärbi berämlekneñ ike qaçqını Tatarstan cirendä qanqoyış oyıştırğaç, VDV başlığı Georgiy Şpak ta üz urınnan kitkän ide. Bu yulı da Yar Çallıdan xezmätkä alınğan qaçqın Qazanğa iltä torğan yulda avtobuslar tuqtalışı yanınnan yıraq tügel urmanda üzen avtomattan atıp ütergän. Serjant Andrey Magaringa nibarı 2 ay ğına xezmät itäse qalğan. Şunlıqtan anıñ üz-üzen üterüe ğäcäp tä. Läkin tikşerü yäşerten bara. Barı tik här soldattan soraw alalar, digän mäğlümat kenä bar.

Sember ölkäse awıllarında qorban çaluçılar bik küp. Läkin mäcleslär cıyuçılar siräk, kübese qorban iten moxtaclarğa taratu belän çiklänälär. Çönki tabınğa täm-tom, ciläk-cimeş kiräk, ä kibetkä barırğa awıl xalqında aqça yuq. İske Mayna rayonı Qızılsu awılında xucalıq räise Äsxät Nasibullov, xucalıq xisabınnan ügez buğazlap, awıl xalqı öçen mäcles oyıştırğan. Ğomum çarağa kilä almağan ölkän yäştägelärneñ öylärenä üz öleşlären iltkännär, şulay uq mäktäp häm balalar baqçasında ayırım mäcleslär oyıştıru öçen, alarğa da öleş qaldırğannar. Awılnıñ imamı İbrahim xäzrät Yaxşımoratov bu çaranıñ iñ zur ähämiäten citäkçelärneñ dingä yaqınayu xalıqqa da işarä ikänendä kürä.

Xucalıq räise Minäxmät ulı Äsxätneñ tağın ber izge ğamäle turında xalıq ğorurlanıp söyli. Bik uñğan altın qullı yeget awıl xalqınıñ timer-tomırğa qağılışlı barlıq ğözerlären ütäp kilgän, aqça soramağan, xäyer-sadaqa bulır, dip yörgän. Ämma yärdäm aluçılar yärdäm öçen räxmät yözennän yegetne, Räsäyçä inde, araqı belän sıylarğa tırışqannar. Näticädä yegetebez şul zäxmät belän mawığıp kitkän. Xucalıq citäkçese anıñ öyenä barğan, sin bezgä, xalıqqa, xucalıqqa kiräk, äräm bulasıñ, awıl xalqın yätim itäseñ, digän. Häm bik küp aqça sarıf itep, anı däwalanuğa cibärgän. Mulla äytüençä, “yegetebezneñ çırayında nurlar balqi, Allah birsä öyländerep tä cibärerbez, awılda tağın ber ğailä östäler.” İbrahim xäzrät ayıruça Äsxät Nasibullovtay citäkçelär kübräk bulsın ide, digän teläktä. Awılnıñ mondıy yarlı xälgä töşüendä elekke citäkçelärneñ dä ğayebe zur buldı bit, di ul.

Ul'yanda Salawat konsertı bu yulı ayıruça millilege belän ayırılıp tordı. İlham Şakirov repertuarı cırlarınnan torğan tezmäne yäş talant İldus Ğilmanov belän bergäläp başqaruın bu tamaşanıñ ğına tügel, ğomumän, Salawat icatınıñ iñ yuğarı noqtası dip bäyäläwçelär dä bar ide. Şulay uq Älfiä Afzalovanıñ da Salawat konsertında qatnaşuı – yäm östenä yäm buldı. Anı zaldağı 1200 çaması keşe berdäm räweştä ayagürä basıp qarşıladı.

Azatlıq radiosı, Ayrat İbrahim, Sember

XS
SM
MD
LG