Accessibility links

шимбә, 10 декабрь 2016, Казан вакыты 15:58

Matbuğat küzätüe


Tatarstan yäşläreneñ 10nçı fevral sanında Mäskäw metrosındağı faciğä uñayınnan Tağın qayçan şart itär digän isem astında qayber bilgele keşelärneñ fikerläre urın alğan. Alarnı jurnalist Riman Ğilemxanov citkerä. Ä Zöläyxa Qidaşeva isä, üzeneñ Çimal digän yazmasında küptän tügel genä Qazanda ütkän Molodejnıy akademii Rossii bäygesen barışında tuğan fikerläre belän urtaqlaşa. Mäqäläneñ töp fikere – bezneñ sälätle yäşlär üz xalqı öçen tügel, ä Könbatış öçen icat itärgä uqıy, äzerlänä. Avtor, üzebezgä, üz xalqıbızğa xis, fiker, zurlıq östärdäy festival’lär ütkärä başlarğa waqıt tügelme digän soraw quya. Şulay uq gäcitneñ traditsion 13nçe bağana dip isemlängän rubrikasında uquçılar xatlarınnan iñ qızıqlı fikerlär urnaştırılğan. Watanım Tatarstan gäcite üzeneñ sişämbe sanında räsmi yañalıqlar häm qararlardan tış, uquçılarğa xalıqara küzätü häm sport xäbärläre dä täqdim itä. Mäsälän, Atlas Ğafiyätov 13-14nçe fevral könnärendä Qazanda milli köräş buyınça yarışlarnı täqdim itä. Älege bäyge Watanım Tatarstan gäciteneñ şağir Musa Cälil isemendäge prizına ütäçäk. Läkin iğtibarğa layıq töp tema bulıp Can awazı rubrikasında dönya kürgän professor İldar Nizamovnıñ “Borğalanu” yazması toradır, möğäyen. Anda ğalim Qazanda tatar teleneñ torışı xaqında uylana. Mäqälädä urın alğan fikerlär İldar äfändegä Yaña ğasır radiosında yañğırağan ber tapşırudan soñ kilgän. Bu tapşıruda Qazan şähäre xakimiäteneñ milli eşlär buyınça idärä citäkçese İrek Arslanov başqalada tatar telen ğämälgä kertü belän tanıştırğan. Ğälim fikerençä, bu ölkädä eşlär şähär xakimiäte wäkile äytkänçä, alay uq al da göl tügel ikän. Saylawlar belän qızıqsınıp, nämzätläreneñ mal-mölkäte xaqında mäğlümatnı küzätep baruçılar, gäcitneñ bu sanında Rusiä töbäkläre, Eşmäkärlekne üsterü häm Rusiä kommunistik eşçelär firqäläre nämzätläre turında beleşmä ala ala.



Şähri Qazannıñ berençe bitendä respublikada mädäniät ölkäseneñ torışı belän tanışıp bula. Uzğan yılda, mäsälän, älege tarmaq ixtiacları öçen 1 milliard yarım sum aqça totılğan. Şularnıñ 500 meñe – byudjettan. Şuña da qaramastan, awıl cirlärendäge mädäniät uçaqlarınıñ matdi xäle bik awır bulıp qala birä. Bu xaqta süz düşämbe könne ütkän Tatarstan Mädäniät ministrlığınıñ yıllıq kollegiäsendä barğan. Anda premyer-ministr Röstäm Miñnexanov ta qatnaşqan. Şulay uq gäcit üzeneñ uquçılarına Tuğan yağım – ğäziz cirem rubrikasın täqdim itä. Anda cirdä eşläwçe ğadi, tırış awıl keşeläre turında yazmalar urın alğan. Gäcitneñ 10nçı fevral sanınıñ tağın ber cıyıntığınıñ teması – millät yazmışı. Älege cıyıntıqnıñ Wasıyät yazıp qaldıruçı İskändärov yazmasında tanılğan millättäşebez, qızıqlı tormış yulın ütkän Mars İskändärov xaqında anıñ awıldaşınıñ istälekläre urın alğan. Rusiä flotınıñ vitse-admiralı, xärbi fännäre doktorı, Sankt-Peterburg şähäre häm Leningrad ölkäse tatarlarınıñ milli-mädäni moxtariäte räise Mars İskändärovnıñ balalarına, onıqlarına wasiäte – anı üstergän tuğan yaqnıñ, İskändärovlar isemeneñ danın tağın da kütärü. Annan tış monda 170 meñ millättäşebez yäşägän Orenbur ölkäse tatarlarınıñ tormışı belän dä tanışıp bula. Ölkäneñ Äsäkäy rayonı mäğärif bülege citäkçese Aleksey Brusilov belän äñgämä näq menä şuşı xaqta. Şulay uq rubrika küptän tügel genä dönya kürgän Altın Urdanıñ aqça eşe digän kitabı belän tanışırğa da mömkinlek birä.



Gölnaz İlgizär

XS
SM
MD
LG