Accessibility links

якшәмбе, 11 декабрь 2016, Казан вакыты 13:03

HRW: Legal bulmağan qorallar Slovakiä aşa ütä


Dönyada keşe xoquqları torışın küzätep baruçı Human Rights Watch oyışması qanunsız qoral satu tiräsendäge wazğiät turında xisabın bäyän itte. Legal bulmağan qoral satu öçen Slovakiäneñ kamil bulmağan qanunnarı qullanıla, dielä xisapta. Anıñ avtorı, qoral säwdäse belgeçe Lisa Misol, Yevropa Berlegeneñ may ayında kiñäyüenä qadär Berlek häm NATO bergä şuşı citeşsezleklärne kimetü çaraların kürergä tieş, dip belderde: "Xisap Slovakiä turında, çönki biredä böten Üzäk häm Könçığış Yevropa problemaları çağıla. Häm Slovakiä xökümäte bu ölkädä reformalar başlağan inde, ämma başqarası eşlär äle bik küp" dide xisapnı äzerläwçe Lisa Misol. Üzäk häm Könçığış Yevropadağı bu problemalar ber yaqtan citärlek kotrol bulmağannan kilsä, ikençe yaqtan – Sovet çorınnan qalğan qoral häm elekke küp sanlı xärbi köçlärdän, dide Misol. NATOnıñ kiñäyüe dä Slovakiä aşa küp qoralnıñ kontrolsez ütä aluına mömkinleklär tudırdı. Bratislavada tışqı eşlär ministrlığınıñ matbuğat wäkile Yuraj Tomaga, Slovakiä xökümäte xisapnıñ kopiäsen aldı, räsmi reaksiä soñıraq bulaçaq, dip xäbär itte.

XS
SM
MD
LG