Sişämbe könne Tatarstan Üzäk saylaw komissiäsendä Däwlät Şurası saylawlarında qatnaşuçı firqälär wäkilläre häm Rusiä prezidentı saylawlarında qatnaşuçı nämzätlärneñ ışanıçlıları şobağa saldılar. Başta parlament saylawlarında qatnaşuçı firqälär saylaw byulletennärendäge urnaştırılu tärtibe öçen şobağa tottılar. 8 firqa häm 1 blok isemnäre yazıp salınğan konvertlarnıñ bersen berençe bulıp kommunistlar liderı Aleksandr Şaliy tartıp çığardı. KPRFnıñ Tatarstan bülegenä saylaw byulletennärendäge 5nçe urın çıqtı. 1nçe urın “Yedinaya Rossiä”neñ Tatarstan bülegenä eläkte. “Ber bäxetsez gel bäxetsez- anıñ güre läxetsez”-digännär borınğılar. Rusiä Dumasınnan töşep qalğan SPSqa, yäğni saylawlarda qatnaşu öçen terkälä alğan uñ köçlär firqasenä, soñğı 9nçı urın çıqtı. Citmäsä älege firqäne “Partiä jizni” bülege- terkälü tärtiben bozuda ğäyepläp mäxkämägä birgän ikän. Şuşı könnärdä Tatarstan Yuğarı Mäxkämäsendä älege däğwä buyınça Üzäk saylaw komissiäse cawap totqan häm SPSnı terkäwdä qanun bozular bulmawın isbatlıy alğan. Xäyer şobağa salu tarixın söyläp beterik äle. İkençe itep Rusiä prezidentı saylawlarında qatnaşuçı nämzätlär öçen çığış yasawlar öçen buşlay efir waqıtı birü tärtibenä şobağa salındı. Şobağa saluda qatnaşu öçen möräcäğätlär Sergey Glaz'yev, İrina Xaqamada, Sergey Mironovlardan ğına birelgän bulsa da şobağa da barlıq nämzät wäkilläre dä qatnaştı dielä räsmi xäbärdä. Öçençe şobağa Däwlät Şurasına saylawlarda qatnaşu öçen terkälgän fiqälärgä şulay uq buşlay efir waqıtı bülü tärtibenä salındı. Älege firqälärgä däwlät tele radiokanallarında buşlay cideşär minut waqıt birelä. Läkin teledebatlar ütkärelmäyäçäklär dip iskärtelde räsmi mäğlümat çaralarında. Şulay itep bulaçaq saylawlarda qatnaşuçılar häm saylaw aldı kompaniäse alıp baru tärtibe açıqlandı.
