Accessibility links

дүшәмбе, 5 декабрь 2016, Казан вакыты 15:37

Qırım tatarlarınıñ cir alu mäsäläse millätara kierenkelekkä äylänä bara


Soñğı könnärdä Qırımda bulğan waqiğälär yarımutrawda millätara mönäsäbätlärneñ kiskenläşüenä işarä itä. Yalta, Sudaq yaqlarında cir mäs''äläse haman da çişelmägäne qırım tatarların qarşılıq çaraların oyıştıruğa etärgän ide. Soñğı waqıtta cir mäs''äläsenä qazaqlar mäs''äläse quşıldı. Qazaq oyışmaları qırım tatarlarına qarşı tora. Näticädä şundıy wazğiät tudı ki, Sudaqta ber tarafta cir taläp itkän qırım tatarları tora – ikençe yaqta alarğa qarşı bulğan slavyan oyışmaları – qazaq cämğiätläre. Xakimiätlär isä çarasızlıqtanmı ällä qırım tatarlarınıñ cir mäs''äläsen çişä almağanlıqtanmı wazğiätne kontroldä tota almıy. Sudaq şähär başlığı Leonid Şremftan xattä şundıy fiker yañğradı – qırım tatarların cir belän tä''min itüne ayırım maddä belän finanslawnı tuqtatırğa kiräk, çönki bu – millätara kierenkelekkä genä kiterä, dide Şremf. Uzğan atnada Sudaqta qırım tatarları deportatsiä qorbannarı häykäle yanında cıyılıp Sudaq şähär xakimiäte binasına taba yul tottı. Cıyında qabul itelgän rezolyutsiädä qırım tatar xalqınıñ xoquqların häm milli avtonomiäne kire qaytaru, etnotsid säyäsäten tuqtatu, Qırım cirlären tawarğa äyländerep satıp beterüne tıyu häm yarımutrawda qazaq oyışmaların beterü taläbe bar ide. Älege uram cıyınnarı isä 1nçe fevral könne İsmet Salievnı irekkä çığaru taläbe belän çıqqan qırım tatarlarına Ukraina politsiäse ut açqaç başlandı. İsmet Saliev – ber keşegä höcüm itüdä ğayeplänep qulğa alınğan ide. Ämma Milli Mäcles räise Mostafa Cämiloğlu süzlärençä, İsmet Salievnıñ üzenä 11 keşelek urısça söyläşkän törkem berençe itep höcüm itkän. Mostafa Cämiloğlu millätara mönäsäbätlärneñ kierenkeläşep kitüendä cirle xakimiätlärneñ ğayebe bar, di: "Qırım xakimiätläre häm tatar cämäğätçelege arasında mondıy tartışular bulıp tora, çönki cirle xakimiättä tatarlarğa qarata şovinistik mönäsäbät bar, häm alar töp keşe xoquqların sanğa suqmı" dide Mostafa Cämiloğlu.

Bügen Yaltada Mäcles äğzäse Ayder Mostafaev, Mäclesneñ Yalta regional bülekçäse räise Alexandr Perepeçin östennän mäxkämä utırışı uzdı xäbärlär aldıq. Bu uñaydan qırım tatarları Yalta şähär xakimiäte binası qarşında uram cıyını uzdırırğa tieş ide.

Bügen Qazan waqıtı belän kiçke säğat 11dä 41 metrlı qısqa dulqında efirğa çığaçaq Azatlıq tapşıruında Qırımdağı wazğiät häm anıñ Ukraina säyäsäte, anda barğan saylawaldı köräşe belän bäyle bulu-bulmawı turında tulıraq mäğlümat tıñlarğa çaqırabız.
XS
SM
MD
LG