Accessibility links

пәнҗешәмбе, 8 декабрь 2016, Казан вакыты 06:57

Ğiraqta yaña ülemnär, höcümnär xäzer ğadi xalıqqa qarşı yışraq yasala başladı


Xäbärlärdä äytelgänçä, çärşämbe irtän Bagdadta bulğan çirattağı şartlawda 5 distägä yaqın keşe hälak buldı, xörmätle tıñlawçılar. Ber kön elek näq şundıy uq höcüm İskändriä şähärendä yasalğan ide, anda 50-dän artıq keşe üterelde. İke oçraqta da şartlawlar amerikan köçläre belän xezmättäşlek itkän ğiraqlılarğa qarşı oyıştırıldı. Şulay itep Ğiraqtağı qarşılıq bar xalıqnı qurqıtu maqsatın quya sıman.

Ğiraqtağı wäzğiatne küzätep baruçılar inde elegräk tä, andağı qarşılıq köçläreneñ töp höcümnärne xäzer yaxşı qorallanğan Könbatış ğäskärlärenä tügel, ä ğadi xalıqqa, bigräk tä amerikannarnıñ yaña xakimiate belän xezmättäşlek itkän ğiraqlılarğa qarşı yasıy başlawına iğtibar itkän ide. Soñğı ike kön eçendä genä bulğan ike zur höcüm şuşı yaña taktikanı raslıy. Çärşämbe irtän Bagdadtağı rekrutlar yazu üzägen teträtkän şartlaw 50-läp ğiraqlınıñ hälak buluına kiterde, anda maşinağa quyılğan bomba şartlatıldı. Şul urında bulğan Ğabbas Fädhil kürgännären bolay sürätli:

Audio, Ğabbas Fädhil

"Min uramda torğan 200-läp yäş ğiraqlı törkeme belän bergä idem, şunda bezneñ yanda bomba şartladı. Amerikannarğa zian kilmäde, çönki alar rekrut üzäge urnaşqan bina eçendä ide" di Ğabbas Fädhil. Sişämbe könne näq şundıy uq höcüm başqaladan könyaqta yatqan İskändriä şähärendäge politsiä üzägenä yasaldı. Ülüçelär sanı anda da 50 tiräsendä buldı. Alarnıñ kübesen politsiädä eşlärgä telägän ğiraqlılar täşkil itte. Ay başında Ğiraq tönyağında bulğan ike şartlawda 100-dän artıq keşe hälak buldı, ul çaqta xädäf itep ike körd partiäseneñ idarä binaları saylanğan ide. Amerikannar bilgelägän waqıtlı xakimiat şuşı höcümnär artında nindi köçlär toruın açıqlarğa tırışa. Elek, alar xalıqta qurqu häm qänäğätsezlek xisen arttıru maqsatında nigezdä Saddam keşeläre tarafınnan eşlänä dip añlatıla ide. Ämma bu atnada Ğiraqtağı amerikan xärbiläre, höcümnärgä mäğlüm "äl-Qaidä" törkemeneñ dä qatnaşı buluına işarä itkän ber xat tabuın belderde. Häm xäzer inde amerikannar Ğiraqtağı höcümnärne çit illärdän kilgän islam suğışçılarına bäylärgä tırışaçaq diärgä bula. Çärşämbe şartlawın alar härxäldä şulay añlatırğa tırıştı. Amerikan xärbi wäkile Ralph Baker.

Audio, Ralph Baker

"Älege mizgeldä bügenge höcüm öçen kem cawaplı buluın açıqlaw mömkin tügel, bezneñçä, bolar barısı da "äl-Qaidä" yäisä "Änsär äl-İslam" qullanğan ısullarğa turı kilä" di Bagdadtağı amerikan xärbi wäkile. Şuşı höcümnär Quşma Ştatlarnıñ Ğiraqta mömkin qädär tizräk iminlek häm totrıqlılıq urnaştırıp xakimiatne cirle idarägä tapşıru tırışlıqların qatlawlandıra. İlneñ yaña qorallı köçlären häm yaña politsiäsen qoru şul tırışlıqnıñ möhim ber öleşe bulıp tora. İkençedän, tuqtawsız däwam itkän höcümnär Ğiraq xalqında qurqu xisen arttıra, ildä yaña totrıqlı xakimiat urnaştıruğa ömetne qaqşata. Häm nihayät şartlawlarnıñ öçençe näticäse dä sizelä, Ğiraq xalqı arasında amerikannarğa qarşı doşmanlıq xisläre nığıy bara. Höcümnärdä ğiraqlılar ğına ülüe xalıqta, moña amerikannarnıñ qatnaşı yuq mikän digän sorawlar uyata. Radiobıznıñ Bagdadtağı xäbärçese Sami Alxoya, çärşämbe irtän şartlaw urınında bulıp qaytqaç andağı käyeflärne bolay sürätläde:

Audio, Sami Alxoya

"Min qayber ğiraqlılar belän söyläşkän idem häm alarda bu amerikan höcüme yäisä amerikan planı tügel mikän digän fiker bar. Alar amerikannarnı ğäyeplärgä tora. Ğiraqlılar xäbärçebezgä, ğädättä uramda amerikan xärbiläre dä tora, läkin bügen alar şartlaw waqıtında yuq ide, häm bu şik uyata dip beldergän.

Kärim Kamal, Praga
XS
SM
MD
LG