Accessibility links

Кайнар хәбәр

Mintimer Şäymiev “Svoboda” radiosınıñ “Litsom k litsu” tapşıruınıñ sorawlarına cawap birde


Sişämbe könne Tatarstan prezidentı Mintimer Şäymiev Mäskäw buldı. Ul anda Rusiä prezidentı qarşındağı federativ mönäsäbätlär häm cirle üzidarä mäs’äläläre buyınça komissiä utırışında qatnaştı. Dmitriy Kozak citäkçelegendä uzğan älege cıyılışta süz törle Rusiä qanunnarı proyektları xaqında, alarnıñ federativ mönäsäbätlär häm cirle üzidarägä tä’sire turında bardı. Utırışta Mintimer Şäymiev tä çığış yasadı. Tatarstan prezidentı wäkälätlärne büleşü waqıtında här töbäkneñ üzençälegen istä totarğa kiräk, dip belderde. 11nçe fevral’ könne Mintimer Şäymiev Qazan kremlendä jurnalistlar belän oçraştı. Oçraşuda Svoboda radiosı xäbärçese Mixail Sokolov, Bloomberg agentlığınıñ Mäskäw bülege mödire Vladimir Todres, Azatlıq radiosınıñ Qazan byurosı citäkçese Rimzil Wäliev qatnaştılar. Andağı söyläşüne Svoboda radiosınıñ yäkşämbe könne efirğa çığa torğan Litsom k litsu: lider otveçaet na voprosı tapşıruında işetep bulaçaq. Bu oçraşuda sorawlar bik küp buldı. Läkin söyläşüneñ töp teması bulıp Tatarstan belän federal xakimiätlär arasında tözelgän wäkälätlärne büleşü xaqında kileşü tordı. Şunısın da äytergä kiräk, Mintimer Şäymiev qatnaşlığındağı tapşıru 15 fevral’dä, älege kileşü imzalanğanğa näq 10 yıl tulğan könne, köndezge säğät 2dä efirğa çığaçaq. Azatlıq radiosı sorawlarınıñ berse dä şuşı mäsälägä bağışlanğan ide. Şäymievqa mart ayında Rusiä prezidentın saylağannan soñ, federalizmğa mönäsäbät nindi bulır, Federatsiäne ni kötä, digän soraw birelde. Şuşı uq mäs’älä belän Vladimir Todres ta qızıqsındı. Anıñ fikerençä, Putin, häm ğomumän Rusiä xakimiäte, Federatsiä häm demokratiä eşlärendä qatı qullı säyäsätne xup kürälär. Şäymievnıñ cawabında menä şundıy süzlär dä bar ide.



Rusiä federativ il bulıp qına üseş alırğa mömkin. Ul şul yuldan – federativ xökümät häm grajdanlıq cämğiäten tözü yulınnan bara da. Bu bik awır yul, älbättä. Rusiä öçen unitar il bulıp kitü yulı ciñelräk tä. Läkin anıñ başqa çarası yuq. Çönki soñğı yıllarda yaña buın üsep citte. Alar inde Rusäneñ unitar däwlätkä äylänüenä riza bulmayaçaqlar



Şulay uq, Mintimer Şäymievtan, sez kiläçäk Tatarstan prezidentı saylawlarında qatnaşaçaqsızmı, dip tä qızıqsındılar. Bu sorawğa ul, älegä tögäl äytä almıym, läkin 70 yäşlek prezident buluın telämäs idem min, dip cawap birde. Şulay uq respublikanıñ neft alu häm eşkärtü tarmağındağı xällär turında da söyläşü buldı. Qalğannar cawaplar belän sez yäkşämbe könne, köndezge säğät ikedä, Svobodanıñ Litsom k litsu tapşırunda tanışa alasız.



Gölnaz İlgizär

XS
SM
MD
LG