Accessibility links

шимбә, 3 декабрь 2016, Казан вакыты 01:32

Äfğanstanda tawış birüçelärneñ xoquqları yaqlanaçaq


Äfğanstanda iün ayında uzaçaq saylawlarğa äzerlek kampaniäsendä xoquq bozularnı buldırmaw maqsatı belän ilneñ Tawış Birüne Kontrol İtü İdaräse qağidälär buldırdı. Milli, rasaçıl häm dini säbäplärdän tawış birüçelärneñ terkälü tärtiben bozırğa tırışuçılarğa 2 yılğa qadär törmä cäzası häm 500 dollarğa qadär ştraf yanıy. Saylawlarda qatnaşa alğan 10 million potensial tawış birüçeneñ 830 meñe terkälgän inde. Bu xaqta İdaräneñ komissionerı Gutai Xawri xäbär itte. Äfğanstandağı başqa xäbärlärgä kilgändä, Qabulda bügen ike raketa atılğan. İke bala cärähätlär alğan dip xäbär itelä. Fransiä tışqı eşlär ministrı Dominique de Villepin, Äfğanstannı tözekländerügä finans yardämne arttıraçağın belderde. Ministr bügen Hindstanğa barışlıy Qabulda tuqtadı. De Villepin, şulay uq, Äfğanstanda NATO citäkçelegendäge iminlek köçläre belän idarä itüne Kanadadan soñ Yevropa xärbilärenä küçerü telägen äytte: "İSAF idaräse başında Kanadadan soñ Yevropa köçlären kürergä telibez, häm bu mäs'älädä Yevropadağı partnerlarıbız belän xezmättäşlek itü möhim", dide Fransiä ministrı . Yevropa köçlärenä Belgiä, Fransiä, Germaniä, Luxemburg häm İspaniä xärbiläre kerä. De Villepin Qabulda Äfğanstan tışqı eşlär ministrı Abdullah Abdulla häm prezident Hamid Qarzai belän oçraştı.

XS
SM
MD
LG