Accessibility links

дүшәмбе, 5 декабрь 2016, Казан вакыты 17:38

Mäläkäs şähärendä tatar tele häm ädäbiätı buyınça olimpiada uzdı


Mäläkäs şähärendä uzğan tatar tele häm ädäbiätı buyınça olimpiadada 38 uquçı qatnaştı. 1-nçe urın yawlawçılar Qazanda uzaçaq töbäqära yarışta qatnaşu xoquqına iä buldılar. Tik 9-sıynıf buyınça berençe urın bilgelänmäde. Dimäk, Qazan olimpiadasında Semberdän 9-sıynıf wäkile bulmayaçaq. Qazanğa 11сыйныфтан ike qız – İske Qulatqıdan Alsu Söläymanova häm Barış rayonı Qañlı awılınnan Dilära Suslina baraçaq, 10-sıynıftan – İske Qulatqı rayonı Yuğarı Tereşka awılı qızı Güzäl Äxsäneva.

9-sıynıftan 1-urın birelmäwen Mäğärif idaräseneñ milli tellär buyınça baş belegeçe Fedos'ya Ulendeeva berençe urın birü öçen komp'yutorğa salınğan sorawlarnıñ 75 protsentına döres cawap birü kiräklege belän añlata. Ä iñ yaxşı belemle qız – ölkä üzägendä yäşäwçe Göliä Kälimullina 72 protsent qına cıyğan.

Mondıy mantıyqnı añlawı çiten inde: iñ şäp qız Göliä ikençe bulğaç, kem soñ berençe?

Ber ğibrätle küreneş: yıl sayın 1 – 5-urınnar yawlawçılar arasında ber ük mäktäplär uquçıları bulıp çığa. Yuğarıda äytelgännärdän tış, alar arasında Çardaqlı rayonı – Abdulla, Yenğanay, Nikolayev rayonı - Äxmätle, Zur Çirkle, Ul'yan rayonı Yaña Bidänge awılları uquçıları. Uqıtuçısı nindi, alarnıñ eş cimeşläre dä şundıy inde. Uqıtuçılarnıñ törlelege başlanğıç sıynıflar möğallimäläre öçen oyıştırılğan seminarda da açıq kürende. Berse yartı-portı urısça-tatarça söyli, ikençese Sember öläse tarixı buyınça uqu kitapları kiräk di, çönki Tatarstan kitapları bezgä yaramıy... Ä menä Tatarstannıñ Çüpräle rayonı qızı Gölüsä Kärimovanıñ tele dä şoma, beleme dä yuğarı däräcädä, qayğırtuları da citdi. Seminarnı Uqıtuçılarnıñ belemen qamilläşterü institutı metodistı Naciä Nurmäxämmäteva oyıştırğan ide. Ul däreslärne törleländerergä tırışqan. Zöhrä Xäbibullina täqdim itkän klasstan tış çara, İslam dine nigezläre möğallimäse Ğaliäbänu Zinnätullina birgän äxlaq därese yäş uqıtuçılar öçen sabaq buldı, diärgä dä yarıydır. Mädäniät xezmätkäre Gölsinä Gerasimova oyıştırğan “Onıtılğan xalıq moñnarı” digän çara milli moñıbıznı iskä töşerü öçen faydalı buldı. Ni qızğanıç, xätta xalqıbıznıñ gimnına äylängän “Tuğan tel” cırın belmäwçe uqıtuçılar da bar ikän. Tağın ber küñelsez küreneş: 15 uqıtuçı arasında nibarı 3еsе genä ölkädä çığıp kilüçe berdän-ber tatarça gäzite “Ömet”kä yazılğan. Bu Naciä xanım täqdime belän “Tuğan tel” aktivistları oyıştırğan därestä açıqlandı. Milli xäräkät äğzaları, mäktäplärdä ana tele xälläre belän tanışqaç, anı yaxşırtu çaraları turında süz tottılar. Qazanda çığuçı gäzit-jurnallar öläştelär. Bıltırğı bulsalar da, tanışu öçen – yazılırğa öndäp. Urısça alıp barıluçı däreslärdä terminnarnıñ tatarçasın da balalarğa iñdersennär öçen, “Ömet” gäzitendä basılğan biologiä, geografiä terminnarı süzleklären tarattılar. Şulay uq Qazan gäzitlärendä çıqqan telebez, tarixıbızğa qağılışlı möhim mäqälälärneñ nösxälären.

Ayrat İbrahim, Sember.

XS
SM
MD
LG