Accessibility links

җомга, 9 декабрь 2016, Казан вакыты 03:06

Tatar oyışmaları tatar tele statusı mäs'äläse turında xakimiätlärgä xatlar äzerli


Uzğan programnarıbızda xäbär itkänebezçä, 7 febräl könne Ufada Başqortstan tatar milli oyışmaları berlegeneñ cíılışı bulıp ütkän ide. Anıñ kön tärtibendä ber genä mäsälä – Başqortstanda tatar tele statusı yazmışı mäsäläse qaraldı.

Mäğlüm ki, bıltır dekäber ayında prezident saylawlar waqıtında ğämäldäge ilbaşı Mortaza Räximov Başqortstanda tatar telenä dä status birü mäsäläsen qanuní yul belän xäl itäçägen ışandırğan ide. Ämma saylawlardan soñ ike ayğa yaqın waqıt ütsä dä, republík citäkçeläre bu mäsäläne ber genä dä iskä töşermäde.

Menä şuşı xällär Başqortstan tatar cämäğätçelegen häm tatar milli oyışmaları citäkçelären yañadan da bu mäsälägä nıqlap totınırğa häm republík citäkçelärennän üz wäğdälärenä cawaplıraq qarawnı taläp itü çaraların başlarğa etärde. Uzğan atnanıñ şimbäsendä uzdırğan berlektäge cíılışında tatar milli oyışmaları Başqortsanda tatar tele statusın xäl itüdä yärdäm sorap, Rusiä prezidentı Vladimir Putinğa häm başqa yuğarı dairälärgä xatlar äzerlägän ide. Ul xatlarnı bu atnada här tatar milli oyışması üzläreneñ aktíf äğzaları belän ayırım – ayırım da tikşerep çıqtı häm mäğlüm buluınça, alar üzläreneñ qayber östämälären dä kertkän bu xatlarğa.

14 febräl könne Başqortstan tatar milli oyışmaları Ufada tağın şul uq sostawta cíıla. Bu cíında alar inde äzerlängän xatlarnı yañadan bergäläp tikşeräçäk häm bar oyışmalar isemennän dä alarğa imza quyaçaq. Başqortstan Tatar kongressı Başqarma qömitetı räise urınbasarı, Tatarstannıñ Başqortstandağı säwdä häm iqtisadí wäkillege citäkçese Ramil Bignov äytüençä, bu xatlar kiläse atna başında uq adresatlarına cibäreläçäk, ä Rusiä prezidentı Vladimir Putinğa yazılğan xat ike – öç kön eçendä anıñ üz qulına tapşırılaçaq. «Bu xaqta inde aldan kileşü bar, – di Ramil Bignov. – Putinğa xatnı bernindi aradaşçılarsız üzenä tapşıraçaqbız, çönki kanselárí aşa tapşırsañ, xatnıñ aña barıp citmäwe ixtimal. Barıp citkän oçraqta da, uraw yullar belän bik ozaq barırğa mömkin ul. Ramil äfände fikerençä, Başqortstandağı tatar tele statusı mäsäläse buyınça üz fikeren Putin 14 marttağı saylawlarğa qädär äytsä, xäyerleräk. Annan soñğa qalsa, anı tağın onıtaçaqlar häm tatar milli oyışmaları başqa – tağın da qatğíraq çaralarğa kereşergä mäcbür bulaçaq.

Şunı da iskä töşerep ütik, Başqortstan tatar milli xäräkäte liderları republíkta tatar telenä däwlät tele statusı alu öçen köräşä. Alar fikerençä, tatar tele bu däräcägä bik tä layıq, ä räsmi status belän genä Başqortstanda tatar telen yaqlap ta, saqlap ta bulmayaçaq.

Ä başqort milli oyışmaları häm başqort ğälimnäre tatar telenä status birügä kisken qarşı. Misal öçen, bu temğa Başqorstan Fännär akademísınıñ Tarix, tel häm ädäbiät institutı direktorı İldus İlişevnıñ fikerläre tübändägeçä.

(yazma)

Sez Başqortstan Fännär akademísınıñ Tarix, tel häm ädäbiät institutı direktorı İldus İlişevnıñ fikerlären tıñladığız.

XS
SM
MD
LG