Accessibility links

Кайнар хәбәр

Ufada «Aktyor cırı» bäygese ütte


Ufada 10- 12 febräl könnärendä «Aqter cırı» dip isemlängän republík bäygese bulıp ütte. Öçençe tapqır uzdırılğan icadi yarışmada bıyıl Başqortstannıñ törle şähärlärendäge tatar, başqort häm urıs teaterlarınnan cır başqaru mahirlığı bulğan 18 artist qatnaştı. Ufa «Nur» tatar däwlät teaterı belän Tuymazı şähärendäge tatar däwlät teaterınıñ yäş aqtrisaları da bäygeneñ yomğaqlaw öleşenä ütte. Başqortstan Milli yäşlär teaterında barğan kierenke köräşne qararğa kilüçelär dä küp ide.

Bäyge öç turda ütte häm anıñ soñğı – yomğaqlaw öleşenä 18 başqaruçıdan 11 keşe torıp qaldı. Gran – prinı iskitkeç osta çığışları belän jyürinıñ barça äğzaların äsir itkän Lira Lyämkina yawladı. Ul Başqortstan Milli yäşlär teaterınıñ urıs truppasında eşli.

Tatar artistlarınnan Ufa «Nur» tatar däwlät teaterı aqtrisası Lina Dilmöxämätowa häm Tuymazı şähäre tatar däwlät teaterı aqtrisası Swetlana Zaqírowa bäygeneñ maxsusbüläklärenä layıq buldı. Berençe öçlekkä kerä almasalar da, alarnıñ çığışı jyüridä zur qızıqsınu uyattı.

«Aqter cırı» bäygesendä tatar artistları zurraq ta ciñü yawlar ide. Ämma haman da üzebezneñ üşänlek ayaq çaldı moña. Misal öçen, Ufa «Nur» tatar däwlät teaterınıñ talantlı artistqası Gölnaz Möxämmädiewa baştağı ike turda bik uñışlı çığış yasadı. Aña jyüri äğzaları baştan uq yuğarı bäyä birgän ide häm berençe öç ciñüçe arasında anıñ da bulaçağına şiklänmäde. Ämma Gölnaz Möxämmädiewanıñ ostalığına bäyle bulmağan şartlar kilep kirtä qordı bu ciñügä. Baqsañ, bäygeneñ öçençe turı ütäse kiçne Gölnaz Möxämmädiewanıñ «Nur» teaterındağı spektakldä dä role bar ikän. Teater direktorı häm rejisserı talantlı artistqanı «Aqter cırı» bäygeseneñ yomğaqlaw öleşenä cibärergä mömkinlek tapmağan. Döresräge, citäkçelekneñ teläge bulmağandır inde. Çönki, teläkläre bulsa, icadi bäygedä qatnaşuçını başqa aqtrisa belän dä almaştıru mömkin ide bu könne. Gölnaz Möxämmädiewa, teaterdağı rolen uynap betkäç, tiz genä bäyge ütkän binağa kilep citte. Ämma näq 15 minut elek kenä bäyge tämamlanğan ide inde. Bäygeneñ yomğaqlaw öleşenä uñışlı ütep tä, anda qatnaşa almağan yäş artistqa tügelep yıladı bu ükeneçle xälgä. Jyüri wäkilläre dä bik qızğandı talantlı qıznı, ämma berni eşlär xäl yuq, kem äytmeşli, poyızd kitkän ide inde. Şulay itep, üze eşlägän teater citäkçeläreneñ şäxsi käyefenä qarap, bäygedä ışanıçlı räweştä ciñügä baruçı yäş artistqanıñ layıklı qazanışı urlandı.

Fänis Fätxi, Ufa.
XS
SM
MD
LG