Accessibility links

чәршәмбе, 7 декабрь 2016, Казан вакыты 23:24

Lakhdar Brahimi: Ğiraqta saylawlarğa äzerlekne waqıtqa bäylärgä yaramıy


Berläşkän Millätlär Oyışmasınıñ Ğiraqta saylawlar uzdıru mömkinlegen tikşergän wäkilçelekneñ citäkçese Lakhdar Brahimi, ildä tawış birü mömkin qadär tizräk oyıştırılırğa tieş, dip belderde, ämma saylarlarğa äzerlekne tögäl ber köngä bäylärgä yaramıy, dip östäde ul.

Mäğlüm bulğança Ğiraq şiğiläreneñ ruxi citäkçese Ayatollah Ali Sistani, saylawlarnı 30nçı iüngä qadär, xakimiätne ğiraqlılarğa tapşırğançı uzdırırğa täqdim yasadı. Quşma Ştatlar tawış birergä äle irtä dip, başta idaräne Ğiraqlılarğa tapşırırğa kiräk dip basım yasıy. Kiçä Berläşkän Millätlär wäkilläre Sistani belän oçraştı. Bügen Brahimi, saylawlarnı bilgele ber waqıtqa bäyläw döres bulmas, dide. Üz täqdimnären ul Oyışmanıñ general sekretare Kofi Annanğa tapşıraçaq. Brahiminıñ matbuğat wäkile Ahmad Fawzi, iün ayına qadär saylawlar uzdıru mömkinlegen şik astına quydı: "İldä qorallanğan keşelärneñ küp buluı, tawış birüçelärgä häm namzätlärgä yanaw ixtimalı buluı, qanun sistemasınıñ häm säyäsi çişeleş tabırğa nigezneñ yuqlığı – problema tudıra. Saylawlarğa äzerlek başlanğançı bolarnıñ barısın da xäl itergä kiräk. 30nçı iüngä qadär bolarnı eşläp çığarırğa waqıt bik az" dide Brahiminıñ matbuğat wäkile.

Kiçä Kofi Annan'nıñ matbuğat wäkile Fred Eckhard zur ixtimal belän Ğiraqta saylawlar 2005nçe yılda uzar dip belderde.

XS
SM
MD
LG