14nçe fevral, şimbä könne Tatar ictimaği üzägeneñ plenumı ütäçäk. Älege 15nçe plenum bik qatlawı şartlarda uza. 15 yıl elek bulğan waqiğalarnı, ictimaği üzäkne başlap yörüçe Marat Mölekov, Wafirä Ğizzätullina kebek bu dönyadan kitkännärne iskä alu yäki ayırım keşelärneñ milli xäräkätkä kertkän öleşe, ğibrätle xällärne iskä alu öçen şartlar yuq. Bügenge köndä ictimaği üzäk ni xäldä, ul yañaramı? Aña yäşräk keşelär kilep, eşlär canlanamı? Ällä, ğädättägeçä, mäğlüm keşelärneñ ber-berse belän bäxäsläşüe däwam itäme? Monısın şimbä könne kürerbez. Ä xäzergä şunı äytep bula - şimbä könne ütäçäk plenumğa berençelärdän bulıp TİÜne başlap yörüçelär Damir İsxaqov, Raşat Safin, Rafail Xäkimov kebek şäxeslär anda barmasqa qarar ittelär. Älege qararnıñ säbäpläre turında Damir İsxaqov söyli. Şulay uq ul Tatar ictimaği üzäkne saqlap qalu öçen eşlärgä kiräk ğämällär xaqında da üz fikerlären äytä.
Soñğı arada Tatar ictimaği üzägendä törle ığı-zığılar küzätelä başladı. Ä berär oyışma eçendä andıy tartqalaşular bar ikän, bu älege oyışmanıñ tarqaluına kiterergä mömkin. Minemçä, Tatar ictimaği üzäge, berençe tatar säyäsi oyışması bularaq, yäşärgä tieş. Läkin anda başqa keşelär – yäşlär kilüe zarur. Çönki anda xäzer eş alıp baruçı veterannar iske fikerlelär, alar iske ısullar belän eş alıp baralar. Xäzer bit zamana üzgärde, mitinglar, uramdağı piketlar waqıtı ütte. Aqıl belän eş itärgä kiräk bügenge köndä. Şuña da, ictimaği üzäkneñ eş ısulların üzgärtergä kiräk
Tatar ictimaği üzäge tiräsendä kilep tuğan wazğiät turında Damir İsxaqov menä şundıy fikerdä tora. Bu xaqta tulıraq itep bez sezgä kiläse tapşırularıbızda äle söylärbez.
Gölnaz İlgizär
