Accessibility links

Кайнар хәбәр

Mäskäwdä Transvaal parkında kimendä 26 keşe hälak buldı, 100dän artığı cärähätlär aldı


Kiçä kiç Mäskäw xalqınıñ yal itü urınnarınıñ berse bulğan şähärneñ könyaq-könbatışındağı akwaparknıñ tübäse cimerelep töşte, kimendä 26 keşe hälak bulğan, 100dän artığı yaralanğan. "Transvaal parkında ul säğattä 350gä yaqın keşe bulğan. Tübä cimerelä başlağaç alarnıñ kübese çişengän kileş uramğa yögerep çıqqan. Töne buyı qotqaruçılar bina cimereklären çistarttı, isän qaluçılarnı ezläde. İsän kileş cimereklär astında qalğan keşelär öşep ülmäsen öçen bu urınğa cılıtu sistemaları kiterelde. Hälak buluçılarnıñ tuğannarı belän oçraşır öçen bügen qaza bulğan urınğa Rusiäneñ Ğadättäntış xällär ministrı urınbasarı Vladimir Alexeev kilde. "Kimendä 20 keşeneñ mäyeten taptıq, 110 keşe Mäskäw xastaxanälärenä cibärelde" dide Alexeev.

Soñıraq ülüçelär sanı 26ğa citüe mäğlüm buldı. Başta – akwaparkta şartlaw bulğan, şunıñ näticäsendä tübä cimerelgän digän xäbärlär taralğan ide. Ämma Mäskäw şähär başlığı yuri Luzhkov bu mäğlümatne kire qaqtı, şartlaw bulğanına ber dälil dä yuq, dide. Xäzerge waqıtta hälakät säbäpläre tikşerelä, ämma ber versiä – tübädä küp qar buluı – älegä iñ ışanıçlısı bulıp qala.

Mäskäw merı Yuri Luzhkov, hälakätne binadağı kameralar töşerde, andağı tasmalar tikşerüçelärgä qazanıñ säbäben açıqlarğa yardäm itäçäk, dide: "Tübä kiçke 7 tulıp 15 minut, 43 sekundta cimerelde. Bolar barısı da kameralarğa yazılğan. Tübäneñ cimerelü säbäbe açıqlanırğa tieş" dide Mäskäw merı.

Prokuraturada cinäyät eşe açılğan. Prokuror Anatoly Zuyev süzlärenä qarağanda, akwaparkta eşläwçelär, şulay uq bina arxitektorları häm qabyer injerenerlardan soraw alınğan inde.

Transvaal Parkı 2002nçe yılda açılğan bulğan. Anı Rusiä arxitektura şirkäte ölgese nigezendä 18 ayda ber Törek firması tözegän.

Rusiäneñ ğadättäntış xällär ministrı Sergei Şoygu, Mäskäwdä soñğı yıllarda tiz arada tözelep qullanışqa tapşırılğan sıyfatsız binalarnı täñqitläde häm başqalanıñ böten tözeleşlären yañadan qarap çığarğa çaqırdı.
XS
SM
MD
LG