Accessibility links

пәнҗешәмбе, 8 декабрь 2016, Казан вакыты 15:00

Tatarstan belän Rusiä arasındağı şartnamägä – 10 yıl


Başlanğan atna soñğı 2-3 kön bulğan waqiğalar ruxında yäşi. Rusiäneñ Üzäk saylaw komissiäse räise Aleksandr Veşnyakov Qazanda ğäcäyep tığız grafik buyınça eşläp, saylaw komissiäse äğzäläre, respublika prezidentı, jurnalistlar belän oçraşıp bik küp möhim belderülär yasadı. Ul kommunistlar firqäseneñ Tatarstanda dekaberdä ütkän saylawlar buyınça taratqan däğwäların kire qaqtı, Tatarstanda saylawlar çip-çista ütte, dip belderde.



Uzğan yäkşämbedä Rusiä häm Tatarstan xakimiät orğannarı arasında wäkälätlär büleşü turında şartnamä tözelügä 10 yıl tuldı. Şul uñaydan tügäräk östäl artında söyläşü, şartnamäne äzerläwdä qatnaşuçılarnıñ çäy östäle artında çökerdäşep aluı üzençälekle buldı. Şartnamä veterannarı söyläşüendä Bryussel'dän qaytıp, yaña eş kötep yörüçe Vasiliy Lixaçev, respublikanıñ elekke premyer-ministrı Möxämmät Sabirov, Färit Möxämmätşin, Rafail Xäkimov, İndus Tahirov kebek bilgele keşelär qatnaştı. Şartnamäneñ elekke häm xäzerge mäğnäsen añlatu da törleçä buldı. Fändäs Safiullin Qazan-Mäskäw mönäsäbätlären caylağanda, prokurornıñ pozitsiäsen tozlı-borıçlı süzlär belän añlatqanda, Tatarstannıñ xäzerge prokurorı Kafil' Ämirov aşığıç eşlär buyınça çığıp kitte. Färit Möxämmätşinnıñ da üze citäklägän Berdäm Rusiä firqäseneñ Tatarstan bülegendä utırış bulu säbäple, saylaw mäşäqätläre artınnan çaptı. Qısqası, şartnamädä quyılğan mäs'älälär haman qızu, nindider bäxäs äle dä däwam itä. Mäskäw mäğlümat çaraları häm säyäsätçeläre şartnamä yubileyın bilgeläp baş awırttırmadı, qotlaw otkrıtkaları salıp rasxutlanmadı. Mintimer Şäymiev, şartnamä barıber eşli, aña qayber üzgäreşlär keräçäk, çönki respublika konstitutsiäse üzgärde, dip beldergän ide. Xalıq deputatı Marat Ğäliev şartnamäne kamilläşterü turında süz başlansa da, xäzer nişläpter üzäktäge xakimiät bu xaqta onıttı, digän şöbhäle belderü yasadı. Şulay itep şartnamä soñğı könnärneñ iñ möhim säyäsi dokumentı buldı.

XS
SM
MD
LG