Accessibility links

сишәмбе, 6 декабрь 2016, Казан вакыты 13:20

Tatar yäşläre dä İzge Valentin könen bäyräm itte


Uzğan yal könnärendä mädäni çaralar küp qatlı buldı. Şalyapin isemendäge xalıqara opera festivale tämamlanğanda bula torğan gala-konsert Salix Säydäşev isemendäge zur konsertlar zalında oyıştırıldı. Anda Rusiä teatrlarınnan häm çit illärdän kilgän ataqlı cırçılar häm beraz Qazan säxnä ostaları da qatnaştı. Gala-konsertnı tıñlarğa teläwçelär küp bülü säbäple, ul ğädättägeçä ber kön genä tügel, ä ike kön rättän ütkärelde. Rusiä opera sänğäteneñ bu könnärdäge märkäze Qazannan tä'sir alıp kitüçe muzıka belgeçläre, tänqitçelär üzläreneñ bäyälären soñraq iğlan itärlär.



Näq şul uq könnärdä, 2 gala-konsert belän berrättän, ataqlı cırçı İlham Şakirov tuğan könenä bağışlanğan 2 sänğät kiçäse ütte. Yäkşämbe kiçendä filarmoniä zalında uzğan kiçädä İlham Şakirov belän bergä anıñ säxnä dusları, mädäniät ministrı İldus Tarxanov buldı. Düşämbe könne ul xäzerge estrada yoldızı Salawat belän bergä säxnägä çıqtı. Fevral' urtasındağı bu könnär Musa Cälil iseme belän dä bäyle. İke yıldan şağirneñ tuuına 100 yıl tula. Şuñamı, başqa säbäptänme bıyıl Cälilneñ tuğan könenä zur iğtibar birelde.



Cälil, Şalyapin, İlham Şakirov isemnären zurlap kiçälärgä baruçılardan başqa, yäş buınnıñ tağın ber üzençä bäyräme buldı. Xristiannarnıñ İzge Valentin köne uñayınnan diskotekalarda, kafelarda, tönge klublarda, xätta Piramida zalında yäşlär öçen tamaşalar ütte. Şimbä könne, salqın Bauman uramında Valentin köne xörmätenä käyef-safa qırğan, qızmaça yegetlär-qızlar isäpsez-sansız ide. Yäştäşlärennän qalırğa telämägän tatar qızları da bu könne diskoteka yäki, hiç bulmasa kafeğa, kerä almıyça integep yördelär. Dimäk, tatar häm möselman yäşläre öçen dä mäxäbbät belän bäyle häm küñelle kiçälär kiräk. Şundıyraq tä'sir qaldı.



Rimzil Wäli

XS
SM
MD
LG