Accessibility links

Кайнар хәбәр

Yukos aksionerları Xodorkovski irege öçen Rusiä räsmilärenä kontrol paket täqdim itä


Yukos neft kompaniäseneñ berniçä aksionerı Rusiä räsmilärenä kötelmägän täqdim yasadı. Yukosnıñ xäzerge waqıtta törmädä utırğan elekke citäkçeläre irekkä çığarılğan oçraqta alar kompaniäneñ kontrol paketın däwlätkä tapşırırğa äzerlek belderä. Rusiä räsmiläre bu täqdimgä älegä cawap birmäde.

Berençe qaraşqa törmädä utırğan iptäşlären satıp alu ğämälenä oşağan bu täqdimne düşämbedä Yukosnıñ baş aksionerlarınıñ berse, xäzerge waqıtta İsraeldä yäşägän, Leonid Nevzlin yasadı. Yukosnıñ elekke citäkçese Mixail Xodorkovski häm tağın ike xezmätkär, Platon Lebedev belän Alexei Piçugin irekkä çığarılğan oçraqta, ul kompaniäneñ kontrol paketın däwlätkä tapşıru-satu turında söyläşülär başlarğa äzer. Nevzlin üze monı alış-bireş dip atamıy:

Audio (Leonid Nevzlin)

"Min ireklekkä almaşqa milek täqdim itmim. Min bu keşelärneñ totqarlanu şartların üzgärtergä, irekkä çığarırğa häm normal söyläşülär başlarğa täqdim itäm. Xäzergä söyläşü mömkin tügel: alar telefon aşa da söyläşä almıy, min Rusiägä kilä almıym, Kreml türäläre Yukos citäkçelärenä minem belän söyläşüne tıya."

Rusiäneñ iñ ere neft kompaniäse Yukos tiräsendäge xällär Rusiä genä tügel, bar dönyada şaw-şu quptardı. Rusiäneñ iñ bay keşese sanalğan Xodorkovskinı Rusiä räsmiläre salımnan qaçuda, üzläşterüdä ğäyepli. Ämmä küp kenä küzätüçelär, Xodorkovskinıñ opozitsiädäge partiälärgä yärdäm itüwen iskä alıp, monıñ artında säyäsät tora dip sanıy. Niçek kenä bulmasın şuşı xällärdän soñ çit il investorları Rusiägä şiklänep qarıy başladı, Yukosnıñ Sibneft belän berläşüe tuqtatıldı, Rusiä-Amerika mönäsäbätlärendä suınu sizelde.

Rusiä räsmiläre Yukos aksiäläreneñ ber öleşen tuñdırdı, ämmä 44 protsentı Gibraltarda terkälgän Menatep törkeme qaramağında. Berlgeçlär monı 15 milliard dollar dip bäyäli. Töp aksionernıñ ikese, Mixail Xodorkovski belän Platon Lebedev, törmädä. Ä menä Nevzlin, Dubov häm Brudno xäzerge waqıtta İsraeldä. Nevzlin süzlärençä, bu täqdimne alar 3se dä xuplıy:

Audio (Leonid Nevzlin)

"Berençedän keşelär irekkä çığarğa tieş. İkençedän, ägär Rusiä räsmiläre bezneñ anda bulunı telämi ikän, bez çigenergä äzer. Bez monı qanuni eşlärgä yärdäm itä alabız, bezsez alar monı qanuni eşli almıy, häm ğädättägeçä axmaq bulıp qalaçaq."

Rusiä räsmiläre älegä bu täqdimgä ber cawap ta birmäde. General Prokuratura räsmiläre bezgä Yukostan ber täqdim dä kilmäde dip belderä. Alay da İnterfax agentlığı, iseme äytelmägän ber räsmineñ, bu täqdim qanun yağınnan da, äxlaq yağınnan da qabul iterlek tügel, digän süzlären kiterä. Läkin "töten utsız bulmıy" dilär. Nevzlin süzlärençä, soñğı waqıtta aña üzen aradaşçı dip tanıtqan inde berniçä keşe möräcäğät itkän. Şul uq waqıtta Rusiäneñ mäglümät çaraları qayber räsmilärneñ moña qarata uñay fikeren kiterä. Äytik, RBK agentlığı xäbär itüençä, Duma räise urınbasarı Oleg Morozov, ägär monıñ näticäsendä kemneñder ireklege satıp alına ikän, min moña uñay qarıym, çönki bu oçraqta keşe dä , däwlät tä ota digän.

Süz dä yuq, Rusiä räsmiläre bu alış-bireşkä turıdan-turı barsa, uñaysız xäldä qala, çönki bu keşelärne cinäyätçe dip iğlan ittelär. İxtimal berär uraw yul tabılır. Rusiäneñ zamança tarixında andıy xälneñ inde bulğanı bar. Zamanında Media-most xujası Vladimir Gusinski milegen Gazpromğa tapşırıp ireklek qazanğan ide. Ul çaqta imzalanğan mäşxür dokument tarixqa "6nçı protokol" digän isem belän kerep qaldı.

Ali Gilmi, Praga
XS
SM
MD
LG