Qazandağı su parkında tübä işelep töşmäsme? Watanım Tatarstan gäzitendä şuşı sorawlarğa cawap basılıp çıqtı. Arxitektura häm tözeleş ministrı urınbasarı İvan Pluşinnıñ äytüenä qarağanda, Qazanda töreklär tözegän şaqtıy bina bar, läkin alarda eş sıyfatlı itep başqarılğan. Qazandağı su parkınıñ tübäse dä nıqlı, timerdän eşlängän ikän. Anı da törek şirkätläre tügel, ä Tatarstan tözüçeläre yasağan bulğan. Şuña kürä, su qoyınuçılarğa ber dä qurqası tügel ikän, digän yazma bastırıp çığarğan Watanım Tatarstan gäzite.
Şul uq gäzittä yaña säxifä çığa başladı : uzğan atna qaytawazı. Anda törle bilgele keşelär ütkän 7 köndä bulğan häm istä qalğan waqiğalarnı sanap çığa. Mäsälän, ber keşe Piterburda häm Mäskäwdä niçek itep Whitney Houston konsert quyıp kitüen iskä ala, bezneñ milli muzıkanıñ da şundıy däräcägä kütärelüen teli, Mäskäw-Qazan şartnamäseneñ 10 yıllığı da anıñ küñelendä qalğan. Gäzitneñ äñgämädäşen, yäşlärneñ, İzge Valentin köneneñ öyeleşep eçü belän bäyräm itüläre, bigräktä teträndergän ikän.
Tağın ber äñgämädäş, izge Valentin köneneñ bezneñ cirdä bäyräm itelüe globalizmnıñ ütep kerüe belän bäyli. Ä İvan Rıbkin tarixı, anıñça, saylawlar tärtibendäge tärtipsezlekne kürsätä.
Fiker belderüdä qatnaşqan öçençe keşe, Mäskäwdäge faciğäle xällärne iskä ala häm , Allağa şöker, Tatarstanda andıy xäwef-xätärlär yuq, dip söyenep quya.
Watanım Tatarstan häm Республика Татарстан gäzitlärendä Tatarstan deputatı bulırğa telägän nämzätlärneñ çığışları basılıp çıqtı. Saylawçılarnıñ alarnıñ wäkile bulırğa cıyına torğan keşelärneñ uy- fikerläre belän tanışırğa häm yözlären kürergä mömkinleklär buldı. Nämzätlärneñ qaysıberläre, tärtip urnaştırırğa wäğdä itä, ikençeläre kommunal’ tüläwlärne cayğa salaçaqmın, dip belderä. Ber xatın-qız nämzät yäşäw däräcäsen kütärergä yärdäm itäçäkmen, bala häm ananı yaqlıy torğan qanunnar buldıraçaqmın, dip wäğdälär birä. Küpçelek çığışlarda sotsial mäs’älälär töp urını alıp tora, ä milli mäs’älä bersendä dä telgä alınmıy.
Bikä Timerova.
