Accessibility links

дүшәмбе, 5 декабрь 2016, Казан вакыты 03:30

Meditsina turında


17nçe fevral'dä Tatarstan sälämätlek saqlaw ministrlığınıñ yıllıq kollegiä utırışı buldı. Anda respublika meditsina tarmağınıñ 2003nçe yıldağı eşenä yomğaq yasaldı, 2004nçe yılğa eş plannarı qaraldı. Sälämätlek saqlaw xalıq öçen iñ möhim tarmaqlarnıñ da iñ çetereklese bulğanğa, bu eşkä iğtibar bik zur buldı. Utırışqa barlıq rayonnardan häm şähärlärdän, uqu yortlarınnan, klinikalardan, şifaxanälärdän sawlıq saqlaw öçen cawaplı keşelär, zur ğalimnär, idäräçelär cıyılğan ide. Tabiplar cıyılışına respublika xökümäte başlığı Röstäm Miñnexanovnıñ kilüe dä şunı kürsätä. Sawlıqqa xalıq ta, xökümät tä bitaraf tügel. Bu utırış yaman şeş awıruları üzäge binasında ütte.

TR sälämätlek saqlaw ministrı Zıyätdinov Kamil dokladında äytelgänçä, çirlär arasında berençe urında yöräk-qan tamırları awıruları qala, alar 61,3% täşkil itä, ikençe urında yaman şeş awıruları – 12%, öçençe urında travmalar. Tuuçılar sanı uzğan yılda 10,3% qa artqan. Ülüçelär sanı da artıp bara.

Tarmaqqa däwlät aqçası az salınmıy - 8,6 milliard sum aqça salınğan. Xalıqnıñ xastaxanälärdä täwlek däwalanu waqıtı kimep bara, yäğni şifaxanädä ozaq yatmasqa tırışalar. Tatarstanda 1998-2003nçe yıllarda bala üleme dinamikasına qarağanda isän tuğan balalarnıñ ülü oçraqları kimi bara. Şifaxanälärdä tüläwle uñaylıqlar küläme arta - soñğı ber yılda bu kürsätkeç 7,7 protsentqa citkän, uzğan yılda bu san 2 protsent täşkil itkän. Xosusıy sälämätlek saqlaw sistemasında 597 tabip häm 547 meditsina oyışması litsenziä belän eşli. Ser tügel meditsina ölkäsendä eşläwçelär küp aqça almıy. Qazanda meditsina xezmätkärlärenä tüläw xaqı 2002nçe yılda 2800 sum bulsa, uzğan yılda 3005 sum täşkil itte.

TR sälämätlekne saqlaw ministrı urınbasarı Safiullin süzenä qarağanda yalğan daru yasaw oçraqları arta bara ikän.

R. Miñnexanov fikerençä nigezdä Respublikanıñ meditsina sisteması sıyfatlıraq eşli başlağan. Läkin xalıqqa meditsinağa qağılışlı mäğlümat yaxşıraq citkerelergä tieş. Xosusıy däwalaw oyışmalarnı premyer xuplıy. Anıñ fikerençä meditsina oyışmalarına nindi çığanaqtan tülänüe möhim tügel, iñ ähämiätlese meditsina xezmätkärläre tieşle tüläw xaqı kürü häm xalıqqa kiräkle xezmät kürsätü. Kollegiä utırışı axırında uñışlı eşlär öçen tabip häm şäfqät tutaşlarğa büläklär tapşıru tantanası buldı.

Şul uq sişämbe könne ZAGS- grajdannarnıñ xälen, bala tuu, ülem töşemnärne terkäw idäräseneñ dä yıllıq utırışı buldı. Ul Musa Cälil uramındağı 7 yortta niqax sarayı binasında ütte. Xisap dokladı belän idärä citäkçese Flürä İldarxanova çıqtı. Ul da balalar tuu, keşelär üleme tabiği kimü häm artu turında sannar kiterde. Min ber-ikesen genä äytäm. Xäzer tulı bulmağan, yäğni atasız ğailädä bala tabu arta ikän. Sovet rayonında bu san 30 täşkil itkän. Ä respublika buyınça 7171 ir üzeneñ çittä tuğan balasın räsmi räweştä tanığan.

Al'bina Zäynulla.

XS
SM
MD
LG