Accessibility links

Кайнар хәбәр

Tatarstanda Tuğan tel atnalığı bara


Çärşämbe könne Qazannıñ kitap kibetlärendä bik üzençälekle satıp aluçılar buldı. Alar tatar telendä, tatar mädäniätenä, tarixına qağılışlı basmalarnıñ satuda buluı belän qızıqsındılar. Bu satıp aluçılar däwlät kitap kibetlärendä tikşerü-reyd ütkärüçelär ide. Anda respublika Ministrlar Kabinetı, Tatarstan kitap näşriäte, Tatmedia agentlığı wäkilläre häm jurnalistlar qatnaştı. Tikşerüneñ näticäläre nindi soñ? Ğomumän alğanda, Qazannıñ däwlät kitap kibetlärendä satuda tatarça kitaplar bar. Läkin alarnı xalıqqa citkerü, kitaplar belän qızıqsındıru çaraları kiräk. Xäyer, kitaplar citsä dä, süzleklär azraq ikän, çönki näq menä alarğa ayıruça zur ixtiac küzätelä. Annan tış balalar kitapları, Qazannıñ meñyıllığına bağışlanğan basmalar da şaqtıy küp satıp alına, dip söylägännär satuçılar. Tağın ber citeşmäwçänlek – kitap kibetlärendä tatar telendä däresleklär yuq. Däresleklär temasın däwam itep, tağın ber xäbär. 18nçe fevral’ könne Tatarstannıñ Mäğärif ministrlığında tatar tele häm ädäbiäte däreslekläreneñ avtorları cıyıldı. Alar anda bu basmalarnı niçek itep tağın da qızığraq, mawıqtırğıç, uñaylıraq itep eşläw turında kiñäşläşte.



Älege çaralar respublikada 16 fevral’dän alıp 21senä qädär ütä torğan Tuğan tel atnalığı qısalarında uzdı. Bu atnalıq isä 21nçe fevral’dä bäyräm itelä torğan Xalıqara Tuğan tel köne uñayınnan iğlan itelde. İsegezgä töşerep ütik, älege bäyrämne 1999nçı yıldan başlap YUNESKO oyışması täqdime buyınça ütkärä başladılar. Böten dönyada bu könnärdä törle tellärgä bağışlanğan çaralar ütkärelä, alarnı saqlap qalu, üsterü eşläre alıp barıla. Tatarstanda bu bäyräm qayçannan birle ütkärelä soñ? 100dän artıq telle xalıq yäşägän Rusiädä Tuğan tel köne uñayınnan çaralar uzamı? Bu sorawlarnı bez respublika Ministrlar kabinetınıñ Tatarstan xalıqları tellären saqlaw häm üsterü bülege citäkçese Kim Miñnullinğa birdek.



Tatarstanda älege bäyräm 1-2 yıl elek kenä beraz bilgelänep ütä başladı. Bıltır, mäsälän, ayırım ministrlıqlar, mäktäplärdä genä berniçä çara uzdırılğan ide. Bıyıl inde bez külämleräk itep ütkäräbez. Xalıqara tuğan tel könenä bağışlanğan törle mäğlümatlar alır öçen bez Mäskäwdäge qayber federal’ oyışmalarğa möräcäğät itep qarağan idek, läkin alardan bernindi mäğlümat, yärdäm ala almadıq. Ğomumän, Rusiädä bu kön uñayınnan ällä nu zur çaralar ütkärelmi



Şulay uq, Kim Miñnullin Xalıqara tuğan tel köne uñayınnan respublikada ütä torğan çaralar turında da söyläde.



Atnalıq qısalarında Qazanda ğına tügel, ä respublikanıñ rayonnarında da törle çaralar uza. Mäsälän, Çallıda, Buada. Läkin iñ kübe – Qazanda inde älbättä. 20nçe fevral’dä pedagogika universitetında tellärgä bağışlanğan fänni-ğämäli konferensiä ütäçäk, kitapxanälärdä kürgäzmälär eşli, ğalimnär, telçelär belän oçraşular, söyläşülär oyıştırıla. Mäktäplärdä ütkärü öçen bik küp çaralar qaralğan



Sez respublika Ministrlar kabinetınıñ Tatarstan xalıqları tellären saqlaw häm üsterü bülege citäkçese Kim Miñnullinnı tıñladığız.



Gölnaz İlgizär

XS
SM
MD
LG