Accessibility links

чәршәмбе, 7 декабрь 2016, Казан вакыты 19:22

Tomas Niğmätcänov - millät tayanıçı


Bu könnärdä milli xäräkät tarixı, tatar ictimaği üzäge teması kön üzägendä tordı. Bu ictimaği üzäkneñ oyışuına 15 yıl tulu häm şuşı arada ğına uzğan TİÜneñ plenumı belän bäyle. Bilgele bulğança, plenum ütep kitügä dä qaramastan, anıñ turında tulı mäğlümat, cıyılışnıñ nindi dä bulsa qararları älegä qädär dönya kürmäde. Xäyer, bezneñ bügenge söyläşüebez bu xaqta tügel. Milli xäräkättä nindi genä zamanalar, qıyınlıqlar, añlaşılmawçanlıq bulmasın, kiñ xalıqqa tanış tügel millät yazmışı öçen borçılıp yörüçelär bulğan häm xäzer dä bar. Äydägez äle şularnıñ berse belän yaqınraq tanışıp kitik. Azatlıq radiosınıñ Qazan byurosında qunaqta - Qazanda milli tormışnı oyıştıruğa berençe bulıp kereşkän, tatar mädäniäten, telen saqlawğa zur öleş kertkän Tomas Niğmätcanov. 15 yıl elek ul da Tatar ictimaği üzägeneñ berençe cıyılışında qatnaşıp, anıñ oyıştıruğa üz öleşen kertä.



Bloknot agitatora cıyıntığınnan Tatar ictimaği üzägeneñ ustavların tabıp, min üzebezneñ institutta da üzäkneñ bülekçäsen buldırdım. Bez partkom bülmäsendä cıyılıp, institutta eşläwçelärgä tatar telen öyrätä idek. Ä institut monıñ öçen aqça bülep birä ide



Xäyer, üzläreneñ institutlarında ictimaği üzäkneñ bülekçäsen buldırğançı da Tomas Niğmätcanov milli, ictimaği eşlärdän çittä tormağan. Üzgärtep qoru yıllarına qädär ük ul üze eşlägän institutta Cide muza klubın oyıştırğan. Klub äğzäläre zıyalılar belän oçraşular uzdırğan, tarix säyäsät turında söyläşülär alıp barğan. Rus häm tatar temaları bertigez bulsın dip äytsälär dä, min barıber tatar temasın alğa sördem. Şunnan miña “millätçe” digän isem yabışıp qaldı da inde, şunnan birle karyeram da tuqtaldı, di Tomas äfände. Şuña da qaramastan, ul millät tormışınnan bizmägän. Alay ğına da tügel. Küptän tügel genä ul banktan kreditqa aqça alıp, milli xäräkät tarixına bağışlanğan kitap bastırıp çığarğan. Anda Tomas Niğmätcanovnıñ törle yıllarda icat itkän mäqäläläre, anıñ tärcemäsendä Ğabdulla Tuqay, Robert Miñnullin, Sacidä Söläymanova şiğerläre urın alğan. Şulay itep, anıñ fikerençä, milli xäräkät xäzerge köndä sünep, sülpänäyep qalsa da, ul milli tormıştan, millät yazmışınnan kitärgä cıyınmıy. Bu minem yazmışım, di Tomas äfände.



Gölnaz İlgizär

XS
SM
MD
LG