Accessibility links

шимбә, 3 декабрь 2016, Казан вакыты 16:49

Tawış birü säxifäläre TatNetta yaña äyber tügel




Şaw-şu kiterep çığarğan «2003nçı yıl tatarı» bäygese nihayät tämamlandı. www.yuldash.com/poll adresında tawış birü 3 turda bardı. Bu xaqta Tatnet tapşırularında söylägän idek inde. 18nçı fivraldä tawış birü tämamlandı. Belgänegezçä, bäygeneñ öçençe kisägendä ir-atlar arasında ğalim Räşit Sunyäev häm cämäğät eşleklese Räfis Kaşapov yarıştı. Ä xatın-qızlar arasında, ciñü öçen, yawlıqlı tatar apaları häm cırçı Cämilä Nizametdin köç sınaştı. «Yıl tatarı» bäygeseneñ iñ zur sensatsiäse dä bu atnada buldı. Cämilä xanım bäygedä qatnaşudan baş tartuın iğlan itte. Ämma, köräş anıñ belän genä tuqtamadı. Bäygene oyıştıruçı İrek Bikininnıñ äytüenä qarağanda, Cämilä xanım dä, başqa nämzätlär dä, üzlären tawışqa quya da, töşerä da almıy. Qağidälär kürsätkänçä, bu mäs’äläne cämäğätçelek kenä xäl itärgä xoquqlı. Cämäğätçelek tawış birüne däwam itte.



18 fivraldä tönge 12dä, Räfis Kaşapov alğa çığıp, 151 tawış ciğan ide, ä Räşit Sunäev öçen 135 tawış birelde. Xatın-qızlar arasında, tatar apalarına 200 tawış birelsä, Cämil Nizametdinğa 181 keşe xuplaw belderde.

İrek Bikinin häm saytqa urın birep torğan http://www.yuldash.com/ saytı idäräçese İlsur Ğilfanov äle soñğı näticälärne iğlan itmäde. İrek äfändeneñ äytüenä qarağanda, başta idäräçelär tawış birelgän böten kompyuterlarnıñ İP nomerların qarap çığaçaq, yalğan yul belän tawışlarnı arttıru mömkinlege bulğan bulsa, nämzätlärgä birelgän tawışlar kiseläçäk. Şuña, berniçä könnän, sannar üzgärergä dä mömkin.

Tawış birülär, tatar internetı öçen, yaña äyber tügel. Beraz ğına internetta eşli belä torğan keşe, teläsä nindi temağa fiker belderüne oyıştıra ala. www.narod.ru, www.newmail.ru häm başqa şundıy tanılğan tüläwsez web-säxifälärdä ürnäk programmalarnı ala alasız. Tatnetta mondıy äyberne, yış qına, törle forumnarda kürep bula.



Bu könnärdä www.tatar-usa.com.ru saytınıñ forumında şundıy fiker belderü başlandı. Teması bolayraq yañğırıy: tatar telenä latin älifbası kiräkme?



Bu sorawğa 5 törle cawap täqdim itelä: «...äye, anı küptän räsmiläşterergä kiräk»; «... yuq, bu akçanı äräm itü genä»; «...miña barıber»; «...Putin xäl itsen»; «...Şäymiev xäl itsen.». Älegä, «...barıber» häm «räsmiläşterergä kiräk ide»,- digän cawaplar ğına birelgän. Ägär sezdä bu fiker belderüdä qatnaşırğa telisez ikän, http://www.tatar-usa.com.ru/ adresına kerep çığığız.



Başqort yäşläre öçen näşer itelä torğan «Yäşlek» gazetasınıñ forumında da latin xäreflär teması kütärelä. Mäläsän, www.yeshlek.ru saytınıñ forumında idäräçe «... kiril xärefläre belän yazarğa, uqırğa öyrängän keşe, küpme waqıt eçendä latinğa künä alır ikän, aña niçek itep ciñel genä küçep bula ikän?» digän mäs’äläne quya. Anıñ belän bäxäskä kergän ikençe forumçı, «... soñ inde, bu xaqta 90nçı yılda uylarğa kiräk ide», - digän fiker äytä. Ul şulay uq, Tatarstannıñ latinğa küçärgä cienuın häm telägenä ireşä almawın misal itep kiterä.



Sayt idäräçese, soñınnan :«... kiläçäktä cir şarınıñ yartısı latinça yazaçaq», digän fiker belderä. Adresı: www.yeshlek.ru





Bikä Timerova.

XS
SM
MD
LG