Accessibility links

Кайнар хәбәр

İerusalimdä yaña intihar höcüme, İzrail monı "iminlek diwarı"n qorunı aqlawda faydalanmaqçı


İerusalim üzägendäge uramnar bügen yänä aşığıç yardäm maşinaları belän tulğan ide - çirattağı intihar höcümçe şähäreçe avtobusında bomba şartlatıp, kimendä 7 keşene üterde, 60-tan artığın cäräxätläde.

Şuşı höcüm, Xalıqara ğädellek mäxkämäseneñ irtägä Haagta, İzrail qorıp yatqan "iminlek diwarı"nıñ qanuni bulu-bulmawın tikşerä başlawı aldınnan yasaldı. İzrail xökümäte wäkile Dore Gold, bügenge höcüm yähüd yağınıñ kiläçäktä üz watandaşların intihar fälästin radikallarınnan saqlap qaluı maqsatında şul diwarnı qoru eşen azağına qädär citkerergä tieşlegen kürsätä dip belderde.

Audio, Dore Gold

"İerusalimdäge bügenge şartlaw belän Haagtağı äzerleklär arasında turıdan-turı mantiqi bäyläneş bar", di İzrail xökümäte wäkile, häm bolay dip däwam itä:

Audio, Dore Gold

"Fälästin oyışmaları üzläreneñ İzrail xalqına qarşı terror suğışın däwam itü xoquqın saqlap qalırğa cıyına, berük waqıtta alar Xalıqara ğadellek mäxkämäseneñ İzrailne üz keşelären saqlaw maqsatında maxsus kirtä qorudan tıyuına ömetlänä" di Dore Gold. İzrail aldan uq Haagtağı xalıqara mäxkämäneñ wäkalätlären tanudan baş tarttı häm anıñ utırışında qatnaşmayaçağın belderde. Könbatış yardağı fälästin cirlären İzraildän ayırğan saqlanu diwarın qorunıñ qanunilığın tikşerü üteneçe belän mäxkämägä Berläşkän Millätlärneñ Ğomumi Mäclese möräcäğät itkän ide, anda şuşı täqdim küpçelek äğza illärneñ tawışların qazana aldı. Haagtağı mäxkämäneñ qararı ütäw öçen mäcbüri bulmasa da, anıñ xoquqi ähämiate şaqtıy zur bulaçaq häm bu İminlek Şurasında diwarı xaqında maxsus qarar qabul itügä kiterä ala. Fälästin yağı, mondıy kirtä qoru Könbatış yardağı ğadi xalıqnıñ köndälek tormışın qatlawlandırıp, fälästin keşeläre arasında açu wä näfrät xislären genä arttıra, bu üz çiratında radikallarnı terrorğa etärä dip belderä. Fälästin premyer-ministrı Äxmät Qıray bügenge intihar höcümen xökem itte häm ul, Xalıqara mäxkämädä fälästin yağınıñ dälillärenä zian kiterä ala dide:

Audio, Äxmät Qıray

"Bez fälästin cirlärendäme, İzraildäme, ğadi xalıqqa qarşı yasalğan mondıy ğämällärne xökem itäbez, bu fälästin xalqınıñ mänfäğätlärenä qarşı kilä, bu könnärdä bigräk tä" di premyer-ministr Qıray.

Kärim Kamal, Praga

İerusalimdäge höcümgä qädär berniçä säğät aldan İzrail yağı, "iminlek diwarı"nıñ inde qorılğan 8 çaqrımlıq ber öleşen sütä başlağan ide. Ul 7 meñ keşe yäşägän ber fälästin awılın Könbatış Yardan tulısınça ayırıp torğan bulğan. Diwar 1967-nçe yılğı suğışqa qädär ğämäldäge çiklär buylap ütsä dä, şunnan soñ Könbatış Yarda qorılğan yähüd utarların saqlaw öçen qayber urınnarda fälästin cirlären alu xisabına tözelä.

Kärim Kamal, Praga
XS
SM
MD
LG