Awıl, sovxoz süzlären işetkäç, küz aldına iskerep betkän cimerek traktor, kombaynnar kilä. Läkin Qazan yanında urnaşqan Mayskiy sovxozı bu küzallawdan bik ayırıla. Şuşı könnärdä bu sovxozğa TR prezidentı M.Şäymiev häm ber törkem jurnalistlar barıp qayttılar. Bu sovxoz başqalardan ayırmalı bularaq yäşelçälär üsterep, zur aqça eşli. Mayskiy agrokombinatı 1974nçe yılnıñ 21nçe fevralendä oyıştırılğan. 50,3га cirdä pomidor, qıyar, borıç, törle salatlar, xätta limon, vinogradlar da üsterälär. Dönyada zurlığı buyınça sovxoz 3nçe urında tora. Gektar-gektar cirdä böyek teplitsalar urnaşqan. Teplitsanıñ tüşäm-stenaları pıyaladan eşlängän şuña da qoyaş nurlarına monda yul haman açıq. Näq 30 yıl elek Mayskiy sovxozında iñ berençe yäşelçälärne cıyıp alğannar. Yıl sayın alınğan uñışnıñ küläme arta bara. Yäşelçälärneñ üseşe RM 48 fotosintez monitorı yärdämendä küzätelä. Fotosintez protsessı, yafraqlarnıñ temperaturası, xätta yäşelçäneñ könenä niçä sm. üskänen dä kürsätep tora bu apparat. Sularnı yäşelçägä trubka aşa sibälär. Härber rätkä ike barmaq qalınlığında torbalar suzılğan, alar yäşelçäne cılıtıp, üsärgä yärdäm itep toralar. Teplitsanıñ tüşäm-stenaları bik nıqlı yasalğanğa kürä, anıñ 40% cılısı otışlı bulıp çığa. Äzer yäşelçä Qazan, Mäskäw, Seber yaqlarına kilosı 40-80 sum xaqqa ozatıla. Mayskiy sovxozı Mäskäw qıyar kombinatı belän dä xezmättäşlek itä. Bügenge köndä sovxoz yılğa dürt tapqır uñış ala. Şulay itep Tatarstan häm tirä yaq respublikalar yäşelçä belän yıl buyına tä'min itelä. Uzğan yılda sovxozda 19 meñnän artıq tonna yäşelçä cıyılğan. Bu inde Mayskiy sovxozınıñ tarixında bulmağan xäl, xätta reqord diärgä bula. Sovxoznı 15 yıl citäklägän İl'şat Ganiev yubiley uñayınnan kilgän M.Şäymievqa yäşelçälär üsterü häm qullanılğan texnika turında söyläp, teplitsanı kürsätte. Yäşelçä üsterü belän sovxozda bügen 1623 keşe şöğellänä. Şularnıñ 230 inde çirek ğasır buyına yäşelçä üsterä. Urtaça tüläw xaqı biredä 5-6 meñ, läkin 10 meñ dä birelgäne bar. Sovxoz eşe keşe sälämätlegenä zıyan kiterä, çönki teplitsa eçendä uglekislıy qaz küläme kislorodqa qarağanda ike tapqırğa kübräk. Cäyneñ esse könnärendä eşläwe bigräk tä awır. Şuña kürä xezmätçelärgä östämä 300-500 sum aqça birelä. Sovxoz xezmätçelärneñ bik uñışlı itep yäşelçä üsterüe belän bergä mädäniät yortı da bik şäp eşläp kilä ikän. Sovxoznıñ yubileye uñayınnan xezmätçeläre öçen Mayskiy sovxozınıñ mädäniät yortında konsert kürsätelde. Anda Zilä Sönğatullina, İdris Gaziev kebek tanılğan cırçılarnıñ moñnarı da yubiley qotlawı bulıp yañğıradı.
Albina Zäynulla, Qazan
