Accessibility links

җомга, 9 декабрь 2016, Казан вакыты 03:15

Putin xökümätne taratu säbäplären añlattı, ämmä sorawlar qala birä...


İnde belügezçä sişämbedä Rusiä prezidentı Vladimir Putin, Mixail Kasyanov çitäklägän xökümätne urınınnan alıp, premier-ministr wazifasın waqıtlıça anıñ urınbasarı Viktor Xristenkoğa yökläde. Çärşämbedä Putin bu adımına añlatmalar birde, ämmä yaña xökümätneñ nindi bulaçağı turında sorawlar qala birä.

Kiçä urınınnan alınğan xökümätneñ bügenge utırışına kilep, Putin bu qararnıñ säbäplären añlattı. Anıñ ber yağında inde elekke premier Mixail Kasyanov, ikençe yağında – bu wazifanı başqaruçı Viktor Xristenko utırdı. Putin ike säbäp kiterde. Berençese – säyäsi säbäp. Ğämäldäge prezident häm bu urınğa namzät bularaq, min cämägätçelekne xökümät citäkçese urınına täqdim iteläçäk keşe belän tanıştıra alam. Alam ikän, dimäk -- eşlim, dide ul:

Audio (Putin)

Bu tanıştırunı xökümätne quıp taratmıy ğına eşläp bulmıy ideme soñ digän soraw, hawada elenep qaldı. Putin şunduq ikençe säbäpkä küçte. Konstitutsiä nigezendä, yaña saylanğan prezident bolay da yaña xökümät täqdim itergä tieş. 14 mart könne Putinnıñ prezident bulıp saylanaçağına şik yuq. Läkin bu yul belän barğan oçraqta, Putin süzlärençä, yaña xökümät bilegläw artıq ozaqqa suzılaçaq:

Audio (Putin)

Şulay da küzätüçelärneñ kübese çın säbäplär başqa dip sanıy. İñ yış telgä alınğanı ikäw: berençese - Yeltsin keşese sanalğan soñğı räsmi - Kasyanovtan qotılu. İkençese – farsqa äylänä barğan saylaw aldı kompaniäsenä can örü. Älegä Putin yaña xökümät citäkçeseneñ kem bulaçağı xaqında işarä yasamadı. Bu xökümätneñ nindi säyäsät alıp baraçağı da bilgesez. Rusiä mäglümät çaralarında premier urınına törle farazlar äytelä. Liberal qaraştağıraq Alexei Kudrinnan alıp, qatı-qullı Sergei İvanovqa qädär. Säyäsi küzätüçe Andrei Piontkovski süzlärençä, bu urınğa çirattağı silovik bilgelänsä, Rusiädä soñğı aylarda küzätelgän, Yeltsin çorı oligarxların maxsus xezmät patriotları belän alıştıru säyäsäte däwam itäçäk:

Audio (Piontkovski)

Rusiäneñ yaña xökümäte parlamenttağı küpçelek, yağni Berdäm Rusiä nigezendä tözelergä tieş digän fikerlär dä äytelä. Bu qaraşnı bügen partiäneñ citäkçese Boris Grızlov yänä kütärep çıqtı:

Audio (Grızlov)

Ul arada Rusiäneñ Vedomosti gäzite, iseme äytelmägän ber Kreml räsmienä tayanıp, bu urınğa moñarçı bilgesez keşe quyılu ixtimalın yaza. Ä menä Yabloko partiäse citäkçeläreneñ berse Sergei İvanenko süzlärençä, bu urınğa kem genä quyılsmasın, Rusiäneñ bügenge şartlarında, bäysez mäglümät, bäysez mäxkämä, bäysez eşquarlıq bulmağan şartlarda, xökümät bäysez bula almıy, ul bareber şul uq prezident xökümäte bulaçaq:

Audio (İvanenko)

Prezidentnıñ yaña xökümät citäkçesen bilgeläw öçen 2 atna waqıtı bar. Läkin ul 2 atna kötep tormas tösle. Häm dä kemneñ genä iseme äytelmäsen, Duma bu keşene ber sorawsız raslap quyaçaq dip kötergä kiräk.

Ali Gilmi, Praga
XS
SM
MD
LG