Bügen könyaq Bosniädä Makedoniä prezidentı Boris Trajkovski utırğan oçqıç hälakätkä oçradı. Möselman-Xorvat federatsiäseneñ eçke eşlär ministrlığınıñ matbuğat wäkile Nedzad Vejzagiç, keçkenä oçqıçnıñ qaldıqları tabıldı, isän qaluçılar yuq, dip xäbär itte: "Qızğanıçqa qarşı, Makedoniä wäkilçelegen Bosniäneñ Mostar şähärendä uzaçaq xalıqara konferensiägä alıp barğan oçqıç hälakäte turındağı xäbärne raslarğa mäcbürbez. SFOR köçläre oçqıç qaldıqların taptı, böten yulçılar hälak bulğan" dide Vejzagiç.
Yevropa citäkçelege bügen 47 yäşlek Trajkovskinıñ üleme säbäple tiränten borçılu belderde. Yevropa Komissiäse prezidentı Romano Prodi, älege faciğaneñ bügen buluı bik tä ayanıç, çönki näq bügen Makedoniä premyer-ministrı Branko Çrvenkovski, Yevropa Berlegenä äğza buluı öçen kandidatlığın räsmi qabul itmäkçe ide, dide: "Bügenge xäl bigräk tä şunsı belän ayanıç ki – bügenge kön Makedoniä häm Boris Trajkovski öçen şatlıqlı kön bulırğa tieş ide – bügen Makedoniä Yevropa Berlegenä räsmi namzät dip iğlan itelmäkçe ide – häm bu maqsatqa ireşer öçen prezident Trajkovski'dan kübräk eşlägän keşe bik az" dide Romano Prodi.
İrlandiä premyer-ministrı Bertie Ahern, Makedoniä premyer-ministrı belän oçraşu kiçekterelde, dip xäbär itte.
Yevropa Berlegeneñ tışqı säyäsät başlığı Javier Solana bügenge könne "Makedoniä öçen faciğale kön" dip atadı häm Trajkovski – üz ilen alğa taba alıp barğan därtle, oluğ keşe ide, dide.
Xorvatiä prezidentı Stipe Mesiç süzlärençä, Trajkovski'nıñ üleme Balkandağı säyäsätkä tä'sir yasıyaçaq. Ämma Mesiç häm Balkannıñ başqa citäkçeläre – Trajkovski başlağan totrıqlandıru häm berläşü säyäsäten däwam itäçäklären belderde.
İlneñ konstitutsiäse nigezendä prezident wazifaların waqıtlıça parlament başlığı Lubço Yordanovski başqarıp toraçaq. Prezident sayalwları 40 kön eçendä uzdırılırğa tieş.
