Accessibility links

пәнҗешәмбе, 8 декабрь 2016, Казан вакыты 11:06

Qazanda tatar yäşlär Kongressına äzerlek mäs’äläläre qaraldı.




26nçe fivraldä Bötendönya tatar kongressınıñ başqarma komitetında tatar yäşlär oyışmalarınıñ koordinatsion şurası utırışı buldı. Tatarstan xökümäte Kongressınıñ täqdimen xuplasa, 2004 yılnıñ cäyenä Bötendönya tatar yäşläre qorıltayı ütäçäk. Pänceşämbe könne bulğan utırışta bu çarağa äzerlek mäs’äläse qaraldı.



Bötendönya tatar yäşlär kongressın ütkärü täqdime, milli xäräkät başlanıp kitkän zamannardan birle äytelep kilde. Yäşlär oyışmaları citäkçeläre däwlät oyışmalarına xatlar yazıp qaradı, läkin uñay cawap ala almadı. «Azatlıq» yäşlär berlegeneñ ber cielışında şundıy ber süz bulğan ide: yäşlär kongressın ütkärü turındağı çirattağı möräcäğätkä Tatarstan Prezidentı:«Tatarlarnı yäşlärgä häm qartlarğa bülergä kiräk mikän?», digän cawap birgän bulğan



Yäşlär oyışmaların milli-mädäni eşlärdän çitläşterälär, dip äytep bulmıy. Barlıq Kongresslarda da yäşlär problemalarına bağışlanğan seksiälär eşläde. Soñğı tatar kongressınıñ qararlarına da tatar yäşlär kongressın ütkärergä, digän cömlä kertelgän ide. Bu yulı älege täqdimneñ tormışqa aşırıluı ixtimallığı zurraq. Kongressnıñ başqarma komitetı tırışlığı belän, älege mäs’älä xökümätneñ kön tärtibenä kertelde. Läkin, qarar äle qabul itelmägän, Kongressnıñ başqarma komitetı mäs’äläne tulısınça tikşerep, täqdimnär ciep häm küpme aqça kiräk bulaçağın sanap, aldağı yaz aylarında ğına anı xökümät xozurına täqdim itärgä ciena. Pänceşämbe könne bulğan cielışta 20 Rusiä töbägennän kilgän wäkillärdän täqdimnär ciela başladı.



Samara, Tübän Novgorod, Ekaterinbur, Omskiy, Çuaşstan häm başqa töbäklärdä eş itüçe yäşlär oyışmalarınıñ äyter süzläre buldı. Alar äytelde dä, läkin kübesençä urıs telendä genä.



Tatar yäşlär kongressı älegä 23-27 yun tiräsenä planlaştırılğan. Bu waqıtta tatar yäşägän töbäklärdä Saban tuylar ütkärelgängä kürä, cielışta, yäşlär Kongressın başqa waqıtqa küçerü täqdime yañğıradı.

Ğomumän, qorıltay ölkännär kongressı şikelle uq, zur çara itep ütkärelgängä oşıy. Berençe könne tantanalı töstä qarşılaw, kiçen teatrğa baru bulsa, ikençe köngä – plenar utırışlar, söyläşülär, annan soñğı köngä- fänni-praktik konferensiälär planğa kertelgän. Häm dä, oyıştıruçılar, Bötendönya tatar yäşlär kongressına kilüçelärgä Qazandağı Saban tuynı da qarap kitärgä täqdim itälär.



Başqarma komitetnıñ süzlärenä qarağanda, Bötendönya tatar yäşlär kongressına 1000 meñgä yaqın delegatnıñ kilüe kötelä. Alarnıñ 400-ze Tatarstannan, 250se Rusiä töbäklärennän, 150-läp keşe BDB illärennän çaqırılırğa tieş.



Bikä Timerova.

XS
SM
MD
LG