Accessibility links

Ufada Färit Yarullinnı iskä aldılar


Başqortstanda kürenekle tatar kompozítorı Färit Yarullinnıñ tuuına 90 yıl tuluğa bağışlanğan mädäni çaralar başlanıp kitte. 27 febräl könne Ufada Äxmätzäki Wälidi isemendäge kitapxanäneñ muzíkl' zalında şuşı data uñayınnan jurnalistlar öçen matbuğat oçraşuı oyıştırıldı. Anda Başqortstannıñ tanılğan cırçıları, kompozítorları häm sänğät belgeçläre çaqırılğan ide. Tatarstannan da qunaqlar buldı. Färit Yarullinnıñ tuğanı, ataqlı kompozítor häm möğällim Mirsäyet Yarullinnıñ bu bäyrämgä kilüe ayıruça küñelle.

Oçraşuda çığış yasawçılar Färit Yarullinnıñ tatar muzík sänğätendä genä tügel, ä bar törki xalıqlar mädäniätendä totqan role turında mäğlümatlar birde. Tatar kompozítorınıñ ícatı turında söylägändä anıñ tatar milli balet sänğätenä nigez saluçı buluın da assızıqladılar. Mäsälän, Färit Yarullinnıñ «Şüräle» baletı Rusiäneñ häm başqa çit illärneñ säxnäsendä yartı ğasırdan artıq yäşi inde. Tanılğan cırçı İdris Ğäziev şundí talantlı kompozítornıñ ğömere suğış yalannarında özelüenä uftanu belderde. Şul çaqta republík citäkçelegeneñ Färit Yarullinnı frontqa cibärmäw mömkinlege dä bulğan, ämma anı qaldırmağannar. Şulay itep, xalqıbıznıñ talantlı ulınıñ ğömere anıñ ícatı çäçäk atıp kilgän çağında ükeneçle özelä.

Matbuğat konferensísı tämamlanğaç, şuşı uq zalda Färit Yarullinnıñ tuuına 90 yıl tulu uñayınnan ícat kiçäse dä buldı. Anda ölkän buın sänğät wäkillärennän kürenekle baletmeyster Xaşim Mostayıv Färit Yarullin xaqında istälekläre belän urtaqlaştı. Annan soñ kiçägä kilüçelärgä Färit Yarullin turında wideofilm kürsätelde. Kompozítornı iskä alu çarası cırçılarnıñ häm muzíkntlarnıñ çığışları belän tämamlandı.

Fänis Fätxi, Ufa.
XS
SM
MD
LG