Mädäni comğanıñ Min äyttem rubrikasında Nurğäli Bulatov ekologiä problemaları, tabiğätne, tirä-yünne saqlawnıñ kiräkle xaqında yaza. Nigä soñ bez tabiğätkä haman zıyan kiterergä tırışabız, aña tiskäre qaraş qayçan betär digän cawapsız sorawlar birä ul. Şul uq gäcittä Tatarstannıñ xalıq şağire Fänis Yarullin saylawlar temasına üz-üze belän bäxäs täqdim itä. Üzeneñ Parlament nindi bulırğa tieş digän sorawına ul üze ük, Eşlekle, qıyu häm yaña fikerdän qurıqmıy torğan dip cawap birä Fänis Yarullin. Annan tış älege atnalıq gäcit 14 martta uzaçaq saylawlarda qatnaşuçı nämzätlär häm säyäsi firkälär turında mäğlümätlär dä citkerä. Mädäni comğanıñ İ tuğan tel quşımtası uquçılarnı tärcemäçe häm jurnalist Ğäräf Şäräfetdinovnıñ älifba kitabı turında uylanuları, mäktäplärdä tatar tele däreslären kimetä xaqında fikerlär, Şärif Kamalnıñ tuuına 120 yıl tulu uñayınnan anıñ xaqında klassiklarnıñ istälekläre belän tanıştıra. Şulay uq anda Yunıs Safiullinnıñ şuşı könnärdä üzeneñ yubileyın bilgeläp ütüçe Alsu Ğäynullina turında asıltaş dip isemlängän yazması urın alğan.
Şähri Qazannıñ 27 fevral sanında Rafis Ğizzätullin diktor Nailä Noğmanova belän tanıştıra, anıñ televideniegä alıp kilgän yullar turında söyli. Lyutsiä Xäbibullina isä kompozitor Röstäm Yaxinnıñ fatirı tiräsendä barğan ızğışlar xaqında yazıp, kompozitornıñ ruxın räncetmäs öçen xoquq saqlaw oyışmalarına möräcäğät itärgä çaqıra. Şulay uq gäcitneñ comğa sanında respublika Däwlät Şurasınıñ ikençe çaqırılış deputatlarınıñ soñğı sessiäse xaqında da yazma urnaştırılğan. Xäyer, bu xaqta barlıq comğa dönya kürgän gäcitlär dä yazmıy qalmadı. Watanım Tatarstan da älege çaqırılış Däwlät Şurasınıñ eşçänlege, anıñ eşeneñ näticäläre xaqında külämle yazmalar bastırdı.
Küzätüneñ axırında – soñğı arada çıqqan matbuğatta bik yış oçrıy torğan tağın ber tema xaqında äytäse kilä. Ul da bulsa – tatar cırı, tatar estradası. Tatarstan yäşläreneñ 26 fevral sanında da bu xaqta İskändär Siracineñ şaqtıy külämle Çıraylarığız çıdarmı dip isemlängän yazması urın alğan. Anda xätta tatar cırınıñ sıyfatın kütärü öçen elekkege kebek icadi şuralarnı yañadan torğızırğa kiräk, digän fiker dä yañğırıy.
Gölnaz İlgizär
