Accessibility links

Кайнар хәбәр

Tatar teatrınıñ yoldızı


Qışnıñ soñğı şimbäse mädäniät ölkäsendä zur waqiğa belän bäyle. Bu könne Tatarstanda ğına tügel, ä böten Rusiä tatarları arasında tanılğan aktrisa Alsu Ğäynullinanıñ 50 yäşlek yubiley kiçäse bulıp ütte.
Härwaqıtta bik matur, xisçäñ häm güzäl tawışlı Alsu Ğäynullina bik tiz tanılıp, tamaşaçını üzenä qarata. Ä üzeneñ bäxetle icadi tormışın ul ataqlı rejisser Marsel' Sälimcanov yärdäme belän bäyli. Äytergä kiräk, Tatarstannıñ xalıq artistçası Alsu Ğäynullinanıñ ğailäse dä ğadi genä tügel. Anıñ ire İl'dar Xäyrullin çın säxnä yoldızı, alarnıñ balaları — İskändär dä säxnädä tamaşaçı mäxäbbäten ayulap ölgerde inde.
Qamal teatrında 28 fevral' könne Alsu xanımnı qotlarğa, anıñ awıldaşları, karsttaşları, icattaşları, teatr söyuçelär cıyılğan ide. Şulay uq kiçädä yubiley uñayınnan TR prezidentı M.Şäymiev isemennän dä qotlaw xatı citkerelde. Aldan Alsu Gäynullina üzeneñ icadi tormış yulı turında söyläde. Teatrda uynarmın dip uylamağan da idem, diktor bulırğa xıyallanğan idem, dide ul. Xäzer isä, ul üze dä häm älbättä bez dä, Alsu xanımnı teatrsız, säxnäsez küz aldına da kiterä almıybız.
Qotlawlar, büläklär tapşıru Alsu Gäynullina uynağan spektakl'lärdän özeklär kürsätü belän aralaşıp bardı. Ä alar bik küp. Kiçädä şularnıñ “Qazan sölgese”, “Yara”, “Äldermeştän Älmändär”dän özeklär täqdim itelde. Qamal teatrına yaña rejisser Färit Bikçäntäev kilgännän soñ da, Alsu xanımnıñ qızıqlı rol'läre kimemäde.
Kiçädä Tatarstannıñ xalıq şağire Robert Miñnullin da qatnaştı. Ul üzeneñ çığışında, bez teatrğa maturlıqnı sağınıp kiläbez, bu maturlıqnı kürü, belü öçen bezgä Alsu kiräk, ä anı kürep bez üzebez dä maturlanabız, dide. 28 fevral' könne Ğaliäskär Qamal teatrı binasında ütkän şuşı yubiley kiçäsendä, Alsu Ğaynullinanıñ iñ zur teläge qabul buldı – zal bu könne yaratqan artistçasın qotlarğa aşqınıp kilgän tamaşaçılar belän tup-tulı ide.
Al'bina Zäynulla, Qazan
XS
SM
MD
LG