Accessibility links

шимбә, 10 декабрь 2016, Казан вакыты 08:04

Matbuğat küzätüe


Düşämbe könne Rusiä prezidentı Vladimir Putin inde yaña premyer-ministrnıñ isemen dä atadı. Ä menä Watanım Tatarstan gäciteneñ şimbä sanında Putinnıñ Rusiä xökümäten otstavkağa cibärüen qayber bilgele keşelärneñ mönäsäbäte belän tanışıp bula. Beraz soñarıp bulsa da, sez deputat Räzil Wäliev, Qazanıñ meditsina instrumentları şirkäte citäkçese Nur Şakirov, pedagogiä universitetı rektorı Cämil Niğmätov häm Tatarstannıñ Rusiädäge wäkile Näzif Mirixanovnıñ fikerlären belä alasız. Cämil Niğmätov, mäsälän, älege waqiğanı kötelmägän dip sanasa da, aña uñay bäyä birä. Ä menä Näzif Mirixanov isä, saylawlarğa ike atna qala bu çara piar alımı kebek kilep çıqtı dip sanıy. Şulay uq gäcitneñ berençe bitendä Tatarstan premyer-ministrı Röstäm Miñnexanovnıñ Törkiägä ber könlek vizitınıñ yomğaqları xaqında yazma urnaştırılğan. Annan kürengänçä, Tatneft cämğiäte Törkiäneñ Tupras neft eşkärtü kompaniäsen satıp ala. Şuşı häm başqa räsmi xäbärlärdän tış, Watanım Tatarstan awıl xucalığı häm mäğärif temalarına möräcäğät itä. Berençe temağa gäcitneñ baş möxärrire Miñnazıym Säfärovnıñ Bez nigä xäyerçe digän yazması urın alğan. Anda ul Mamadış rayonındağı yañarış küreneşläre belän tanıştıra. Ä Aleksandr Filippov isä tizdän Rusiädä kertelergä mömkin Berdäm däwlät imtixannarı xaqında yaza. Şunda uq ul uqıtuçı, ata-analarnıñ, qayber yuğarı uqu yortları citäkçeläreneñ fikerlären ireşterä. Äytergä kiräk, alarnıñ barısı da diärlek älege imtixannar bezneñ mäğärif sistemasına kileşmi, digän fikerdä tora.



Tatarstan yäşläreneñ 28 fevral sanında Gölnara Sabirovanıñ Şaytan qorbannarı dip isemlängän külämle yazması dönya kürde. Anda jurnalist respublika narkologiä dispanserında kürgän, belgännäre turında söyli, anda inde ikençe, xätta öçençe märtäbä däwalanuçılarnıñ yazmışı belän tanıştıra. Monda kilüçelärneñ barısı da däwalanıp çığarğa teläp kilsälär dä, bette, noqta quydım, dip çığıp kitsälär dä, küp tä ütmi qabat dispanser işeklären açıp kerälär, dip yaza Gölnara Sabirova. Tatarstan yäşläreneñ bu sanında kütärelgän tağın ber problema – sänäğättä eşçelärneñ citmäwe. Räis Zaripov yazuınça, Çallıda, mäsälän, eşçe hönärenä iä belgeçlärgä ixtiac nibarı 20 protsentqa ğına qänäğätländerelä. Atqa peçänne kem salır yazmasında Räis Zaripov belgeçlär yärdämendä älege mäs’äläne çişü yulların ezli.



Axırda - soñğı könnärneñ matbuğat ölkäsendäge ber xäbäre. Respublika Tatarstan gäciteneñ baş möxärrire alışındı. 1974 yılda redaktor itep bilgelänep, barı tik berniçä yıl ğına gäcittän ayırılıp torıp, älege wazifanı başqarğan Yevgeniy Lisin urınına 27 fevral könne baş möxärrir itep Aleksandr Latışov bilgelände.



Gölnaz İlgizär

XS
SM
MD
LG