Accessibility links

сишәмбе, 6 декабрь 2016, Казан вакыты 21:07

Hollywood: bıyılğı "Oscar"larnıñ xakimdarı bilgele buldı


Düşämbegä qarşı töndä dönya kino sänğätendä üzenä kürä iske yıl tämamlanıp yañası başlandı. Qazanda inde tañ atqanda Los Angeles şähärendä 76-nçı märtäbä mäşhür "Oscar" büläklären tapşıru tantanası ütte. Anı küpläregezgä tanış bulğan "Baldaqlar xakimdarı" filmınıñ tantanası dip atarğa mömkin ide, şuşı film barlığı 11 "Oscar" qazandı.

Barlığı 3 kisäktän torğan häm bügenge köngä bar dönya buylap 3 milliard dollar aqça kitergän "Baldaqlar xakimdarı" bıyılğı "Oscar" tantanasında iñ yaxşı film digän isemgä layıq buldı. Läkin aña ğına tügel. Alsu inde äytep kitkänçä, älege film Los Angelesta barlığı 11 "Oscar" sının qazandı, mondıy uñışqa elegräk barı tik 1997-dä mäğlüm "Titanic" häm 1959-da "Ben Hur" filmnarı ğına ireşkäne bar ide. Kino sänğätenä qatnaşı bulğan härkemneñ xialı sanalğan şuşı altın sınnı alırğa çıqqaç "Baldaqlar xakimdarı"n töşerüçe Peter Jackson bolay dip belderde.

Audio, Peter Jackson

"Oscar" tantanalarına xas xislär taşqınına birelep, iñ yaxşı rejisser isemen dä qazanğan Peter Jackson, Amerika kino sänğäte akademiäse äğzalarınıñ bıyıl üz tawışların sixerçelär, hobbitlar belän tulğan äkiät öçen birüenä nıq şatlanuın häm üzendäge kierenkelektän soñ xäzer inde ciñellek xise kiçerüen belderä. Näq şundıy uq xislärne "Oscar" tantanasınnan soñ iñ yaxşı xatın-qız uyınçı isemen alğan Charlize Theron da kiçergänder, möğayen. Anıñ ciñüen kino belgeçläre häm tänqitçelär aldan uq farazlağan ide. "Monstr" isemle filmda çınnan da yäşägän küpläp üterüçe xatın rolen uynawçı Theron alarnıñ ğına tügel, Akademiä äğzalarınıñ da simpatiäsen qazandı. "Baldaqlar xakimdarı"nıñ Yaña Zelandiädä töşerelüe säbäple "Oscar" tantanasında bu ilgä qarata şaqtıy ğına cılı süzlär äytelde, Charlize Theron da alarğa iärep, üz tuğan ilenä, Könyaq Afrikağa räxmätlären citkerde.

Audio, Charlize Theron

"Biredä Yaña Zelandiädäge härkemgä küp räxmätlär äytelde, şuña kürä dä min Könyaq Afrikadağı härkemgä dä räxmätemne citkerergä telim, alar bu tönne bezne qarıylar häm kiläse atnada min alarğa şuşı sınnı alıp qaytaçaqmın" di iñ yaxşı xatın-qız uyınçısı dip iğlan itelgän Charlize Theron. Şuşı isemgä bıltır layıq bulğan Nicole Kidman isä bıylğı iñ osta ir-at uıynçını iğan itte.

Audio, Nicole Kidman

"... häm "Oscar"... Sean Pennğa kitä, "Serle yılğa" filmı..." Şuşı filmda Penn, qızı üterelgännän soñ üç alu niäte belän yäşägän äti keşene uynıy. Anı, zamanında şulay uq mäşhür uyınçı bulğan Clint Eastwood töşergän. "Serle yılğa"-"Mystic River" iñ yaxşı ikençel plandağı uyınçı isemen dä qazandı, ul bıyıl Tim Robbinsqa birelde. İñ şäp rejisser iseme Peter Jacksonğa birelüe säbäple Eastwoodqa anıñ filmında uynawçı Robbinstan räxmät süzläre genä işetü nasıyp buldı.

Audio, Tim Robbins

Şulay itep Tim Robbins üz uñışın turı-turı Clint Eastwood sälätenä genä bäyli. İğtibarnıñ soñğı yıllarda cidti kinoğa şaqtıy kimüe häm alğa, "Titanic", "Baldaq xakimdarı" tösle aqça cıyuçan filmnarnıñ çığuı ser tügel, bıyılğı "Oscar" tantanası da monı yaxşı kürsätte. Tirän eçtälekle, sälätle äsärlär, şul uq "Serle yılğa" yäisä "Tärcemädä yuğalğan"-"Lost in translation" filmnarı, bu yulı da niçekter çitkä tibärelgän xäldä qaldı.

Kärim Kamal, Praga
XS
SM
MD
LG