Accessibility links

Кайнар хәбәр

AQŞ däwlät sekretare Colin Powell Ğiraq İdarä Şurasınıñ waqıtlı konstitutsiäne raslawın xupladı


CBS televideniesendä çığış yasap Powell waqıtlı konstitutsiä turında kileşüne zur uñış dip atadı häm anı Ğiraqtağı AQŞ waqıtlı administratorı Paul Bremer da ralsar kebek dide. Bu konstitutsiä Ğiraqta saylanğan parlament daimi konstitutsiä äzerlägänçegä qädär ğämäldä bulaçaq. İdarä Şurası süzçese Xämit Kifai bu dokument çärşämbe könne imzalanaçaq dide:

AUDİO: Bu dokument çärşämbe könne iğlan iteläçäk, tantalı räweştä täqdim iteläçäk häm İdarä Şurası prezidentı Möxämmät Bahr äl-Ulum anı cämäğätçelek aldında imzalıyaçaq.

Bügen Londonda Britaniä premyer ministrı Tony Blairnıñ süzçese Blairnıñ bu konstitutsiäne xuplawın belderde häm saylawlarğa qädär ğiraqlılarnıñ töp xoquqların saqlaw mömkin bulaçaq dide. Waqıtlı konstitutsiädä keşe xoquqları telgä alına, xatın qızlarnıñ kiläçäk parlamenttağı rolen garantiälänä häm Ğiraqnıñ federal' däwlät buluı tanıla. Ämma anda Körd azçılığı qaramağındağı cirlärneñ statusı bilgelänmi. Bu mäs'äläne soñraq açıqlaw turında äytelä.
XS
SM
MD
LG