Accessibility links

җомга, 9 декабрь 2016, Казан вакыты 12:53

Tatar yäşläre kongressı kiräkme?


Tatar yäşläre Assotsiatsiäse, Tatar yäşläre Koordinatsion Şurası. Nindi strukturalar bu. Alar närsä belän şöğellänä. Möğayın sorasañ bu xaqta Tatarstandağı ber protsent yäş millättäşebez dä belmider. Çınnan da Bötendönya tatar kongressı Başqarma komitetı qarşında oyışqan tatar yäşläre Assotsiatsiäseneñ dä, Koordinatsion Şurasınıñ da barı isemnäre häm tatar yäşläre öçen närsäder eşlärgä, oyıştırırğa mataşuçı 6-7 yeget-qızı bar (bu sovet zamanında äbi-babaylarğa yärdäm itep yörüçe Timur häm anıñ komandasına oşağan). Şuña kürä älege assotsiatsiä belän Şuranı ayırıp qaraw da niçekter kölke toyıla. Oyışma ike, ä yäşlär şul uq. Häm haman şul ber qazanda qaynıylar.

Düşämbe könne uzğan utırışqa da härwaqıttağıça şul uq 6-7 keşe kilgän ide. Berençe bulıp tatar yäşläre Assotsiatsiäse isemennän anıñ räise Nail Garipov, kiläçäk saylawlar uñayınnan möräcäğät citkerde. Xäzer şunnan ber özek kiteräm.

“Bez, tatar yäşläre barlıq yäşlär, şul isäptä milli yäşlär mänfägat'lären qayğırtqan bügenge säyäsätne xuplıybız. Bezneñ tawışnı Tatarstan ğına tügel, ä federal' üzäk tä işette. Federal' xökümät Tatar yäşläre kongressın uzdırunı tulısınça yaqladı. Häm byudjetta älege çarağa aqça qaraldı. Bez barlıq tatar yäşlären Rossiä Federatsiäse Prezidentı saylawlarında qatnaşırğa çaqırabız”, - dielgän älege möräcäğättä.

Ämma döresen genä äytkändä biregä kilgän yäşlärneñ qayğısı saylawda da, möräcäğäte dä tügel ide. Tatar yäşläre kongressı süze çığuğa alar küptän tügel aña äzerlek maqsatınnan uzğan utırış turında fiker alışa başladılar. Berençedän yäşlärne ul utırışqa citäkçelärneñ kilmäwe açuın kitergän. “Tatar yäşläre berqayçan berkemgä dä kiräkmäde. Min “İdel” tatar yäşläre üzägendä eşlägändä törle çaralar uzdırırğa dip iğänäçelärdän aqça, büläklär telänep yöri idem. Barlıq çaralarğa da aqça tabıla ide, citäkçelär dä kilä ide, ä tatar yäşlәrenä yuq. Şuña min ul eştän kittem dä”, - dip açınıp söyläde Mönirä Säğidullina. Bötentatar ictimaği üzäge räise urınbasarı İnsaf Xämitov “Ul tatar yäşläre kongressı närsägä kiräk soñ. Zurlar kongressı, yäşlär kongressı dip bülü döres tügel. Yäşlär kongressı ul zurlarnıqınıñ ber qapılçığı kebek bulaçaq. 3 ay waqıt qalıp bara. Meñ delegat çaqırıla dilär. Anı qaydan cıyıp betermäkçe bulalar ikän şul arada. Bu bit çınbarlıqqa turı kilmi. Zur itep kongress dip söylärlege yuq”, - dide ul. Şunnan yäşlär kongressı kiräkmi, ul aqçanı yäşlär belän eşli torğan ber üzäk açarğa totarğa kiräk häm anda eşli torğan berniçä keşene utırtu zarur” dieşä başladılar. Qayberläreneñ “İdel” tatar yäşläre üzäge bar iç inde”, - digän süzlärenä qarşı “Ul barlıq köçen quyıp eşlämi”, - didelär. Qısqası, biregä cıyılğannar kongressta eşlänäse tatar yäşläreneñ milli säyäsäten inde tözep tä quydı. Biredä tağın tatar yäşläre kongressınıñ nindi status alırğa tieşlege xaqında süz bardı. Anı barısı da ayırım oyışma itep kürergä beläwläre xaqında äyttelär. Şulay uq monda yäşlär kongressı aldınnan eşlänäse eşlärneñ küp bulaçağın bilgeläp uzdılar häm şul säbäple här çärşämbe kongress binasında oçraşırğa söyläşep taraldılar.

Landış Xarrasova.

XS
SM
MD
LG