Accessibility links

дүшәмбе, 5 декабрь 2016, Казан вакыты 05:39

Saylaw aldı çarasımı – ällä tatarça yaxşılıq qılumı?


Watannı saqlawçılar köne” digän bäyräm qısalarında Ölkä tatar avtonomiäse kürenekle tatarlar belän oçraşu oyıştırğan ide. Bu oçraşunı bäyräm dip tä, saylaw aldı kampaniäse çarası dip tä qabul itärgä bula. Avtonomiä räise Azat Kurçakov üz çığışında saylawlarğa barmaw yäki barısına qarşı tawış birü - berençe çiratta üzeñä zarar kiterü ul, dide. Ul şulay uq ölkä üzäge tatarların küptän borçığan mäs’älälärgä dä tuqtaldı: ölkä üzägendä tatar gimnaziäse häm kitapxanä açu, mädäni üzäkne üz binası belän tä'min itü mäs’äläläre – distä yarım yıllar buyı haman süzdä genä qala birä. Oçraşuda qatnaşuçılar şähär merı Pavel Romanenko isemenä açıq xat belän çığarğa buldılar.

Küp yıllar xalıq arasında kürenmägän Damir Şäripev tä oçraşuğa kilgän ide. Ul uzğan ğasırnıñ 80nçe yılları azağında oyıştırılğan “Millätara mönäsäbätlär buyınça daimi komissiä” räise sıyfatında ölkä tatarlarınıñ milli-mädäni mänfäğätlären qänäğätländerü buyınça sallı ğına eşlär başqarıp ölgergän şäxes. “Putç” dip tarixqa kerep qalğan waqiğalardan soñ, bu komissiä üz eşen tuqtattı, ä Damir Şäripev pensiägä kitte. Başqa wazifa täqdim itsälär dä, üzeneñ kommunistik ideologiäsenä tuğrı qalıp, baş tarttı. Läkin anıñ ğämälläre tatarğa xezmät itä kilde. “Çişmä” televizion programmasın açuda da anıñ öleşe zur buldı. Şunlıqtan, bu teletapşırunıñ avgust ayında waqıtı qısqartıluı häm kiçkedän köndezge waqıtqa küçerelüe anı tirän borçuğa salğan. Damir äfände bu yuğaltuğa qarşı torırğa öndäde.

Läkin bu yulı älege tema buyınça täfsilläp fiker alışu bulmadı. Bälki çara kübräk saylaw aldı kampaniäse çarası sıyfatında oyıştırılğanğadır da...

Xalıqnıñ saylawğa kilüen tä'min itü mäs’äläse ölkä buyınça Baş Federal' inspektor Aleksandr İvanov oyıştırğan çarada da töp mäs'älä itep quyılğan ide. Ul tatar, çuaş, muqşı avtnomiäläre citäkçelegen üz yanına çaqırıp, şuşı uq temağa süz tottı. Azat Kurçakov anda da şul uq öç töp mäs’äläne kütärde. Federal' inspektor isä, ällä añlamıymı – ällä añlarğa telämime: süzne ikençe temağa küçerde. İmeş, ixtiaclar küp: menä İske Qulatqı rayonında xastaxanä remontqa moxtac, ä ber awılnıñ ziratı yıraq ikän, yul pıçraq, anda asfal't salırğa kiräk... Boları aqça taläp itüçe sotsial' yaqlaw çaraları. Ä bit ölkä üzägendä bulğan mäktäp binalarınıñ bersenä tatar balaların ğına cıyıp uqıtuğa östämä çığımnar taläp itelmi, läbasa. Kirägenä yärdäm itärdäy maltabarlarıbız da yuq tügel. Dimäk, aqça turında süz dä yörtergä yaramıy. Xäyer, ğözerne genä tügel, Konstitutsiä birgän xoquqlarnı da ütämäs öçen yuq-bar säbäplär tıñlawğa qolaqlar künegep betkän inde. Şulay uq kemneñ nindi yalğan säbäp uylap tabu ısulları da mäğlüm.

Şulay da bu oçraşuda Baş Fedarl' inspektor awızınnan tämle süz dä çıqtı: Qazan, Çabaqsar, Saranski qalalarınıñ elektron mäğlümat çaraların cirle tatar, çuaş, erzälärgä citkerü burıçı quyılğan, monıñ öçen federal' byudjettan aqça bülep bireläçäk ikän.

Bu – saylaw aldı wäğdäseme, ällä ixlas niätme: älegä bilgesez. Martnıñ 15ennän soñ açıqlanır inde.

“Azatlıq” radiosı, Ayrat İbrahim, Sember.

XS
SM
MD
LG