Accessibility links

сишәмбе, 6 декабрь 2016, Казан вакыты 15:08

Tatarstan turında Yaponiädä dä beläçäklär


Tatarstan üzeneñ başqa illär belän xezmättäşlegen kiñäytä bara. Çärşämbe könne respublikanıñ premyer-ministrı Röstäm Miñnexanov citäkçelegendäge räsmi delegatsiä ber könlek vizit belän Ukrainağa barıp qayttı. Biredä tatarstanlılar Sumı şähärendä buldı, andağı sänäğät şirkätlärenä respublikada citeşterelgän cihazlarnı satu turında söyläşte.

Ä Tatarstan prezidentı çit il jurnalistları belän aralaşuın däwam itä. Çärşämbe könne ul Yaponiä telekanalı wäkilläreneñ sorawlarına cawap birde. Şäymiev qatnaşlığındağı Tatarstan turındağı tapşıru Rusiädä saylaw aldı xällärenä bağışlanğan programmalar şälkeme qısalarında kürsäteläçäk. Şul uq könne Mintimer Şäymiev Qazan kremlendä Yevropanıñ Ombudsmen institutınıñ direktorı Nikolaus Şvetsler belän oçraştı. Bu yılnıñ axırında Qazanda ombudsmennar, yäğni xalıqlar häm keşe xoquqlarınıñ ütäleşen qarap toruçılarnıñ, eşçänlegenä bağışlanğan konferensiä uzaçaq. Tatarstan prezidentı belän oçraşuda süz şuşı xaqta da bardı. Anda şulay uq respublikada keşe xoquqları buyınça wäkil Räşit Wağizov ta qatnaştı, dip xäbär itä İntertat.ru säxifäse. Sişämbe kiçendä qaytıp, Mintimer Şäymiev Qazanda inde eşlekle oçraşular uzdıra başlasa da, Çallıda äle haman prezidentnıñ mondağı säfäre turında söylädelär, anıñ yomğaqların yasadılar.

Gölnaz İlgizär

XS
SM
MD
LG