Accessibility links

шимбә, 10 декабрь 2016, Казан вакыты 23:35

Qazanda “İslam häm sälämät yäşäw räweşe” digän seminar ütte


Bu bik üzençälekle seminar bulıp çıqtı. Çönki anda dönyawi keşelär- tabiplar, fälsäfä ğalimnäre, xätta zavod direktorı belän bergä mullalar, din eşlekleläre qatnaştılar. Seminarnıñ teması “İslam häm sälämät yäşäw räweşe” bulğaç, şuşı mäs''älä törle tarmaq wäkillären qızıqsındırğan. Anı “Watanım”dip atalğan cämäğät oyışmasın bilgele kardio-xirurg Rinat Aqçurin citäklägäç, bu söyläşügä iğtibar arta töşkän. Şul uq “Watanım” oyışmasınıñ Tatarstan bülekçäsen Qazan medik instrumentlar zavodı direktorı Nur Şakirov citäklägäç, süzneñ sawlıq, iktisad, tärbiä belän bäyläp alıp barıluı tabiği. Nur äfände üzeneñ çığışında sälämät yäşäw räweşen din yärdämendä cayğa salu turında äytte. Ataqlı xirurg Rinat Aqçurinnıñ din turında, islam qağidälären ütäwneñ, xämer eçmäwneñ sawlıq üçen faydası turında söyläwen tıñlaw qızıq buldı. Söyläşüdä Tatarstannıñ sälämätlek saqlaw ministrı Kamil Ziyätdinov, islam belgeçe Rafiq Möxämmätşin, respublikanıñ diniä nazäräte citäkçese urınbasarı Waliulla xäzrät, möftiätneñ näsixät bülege mödire İl''dus xäzrät häm Mäskäwneñ Poklonnıy tawındağı mäçet imamı Şamil xäzrät qatnaştılar.

Seminarda qatnaşuçılar xäzerge zaman keşeseneñ şaqtıy tübänäygän äxlağın nığıtu, mädäniäten tieşle däräcägä kütärü öçen keşeneñ ruxi baylıqların torğızuğa basım yasadılar. Ä äxlaq, ruxi baylıq islam dine belän bäyle. İslam dine ul çistalıq, gigiena digän süz. Sälämätlekne saqlaw ministrı Kamil'' Zıyätdinov yöräk-qan tamırları häm bütän xronik awırular, narkomaniä çirläreneñ soñğı yıllarda dönyanı basuları turında äytte. Meditsina bu çirlärne tereltüdä köçsez. Barı tik sälämät yäşäw räweşen ütäw iñ yaxşı däwa bulıp tora. Ä bu din qağidälären ütäw digän süz.

Şamil xäzrät narkomaniä häm bütän çirlärne ciñär öçen allağa ışanunı iñ möhim çara dip kürä. Loxotron kebegräk törle azart uyınnarı kübäyep kitte, xätta soñğı aqçalarnı şul uyınnarğa salıp kitüçelär dä siräk tügel. Şamil xäzrät beldergänçä, keşe üzen üzgärtsä genä, anıñ dönyası da üzgäräçäk. Monda kilüçelär üzläre bulsa da eçmäsälär, alarnıñ balaları da eçmäs ide, dip belderde Mäskäwdän kilgän mulla.

Seminarda qatnaşuçılar “Tatarski mir” gäciteneñ tirän fikerle qızıqlı buluın äytep, bu basmanı çığaruçılarğa räxmät belderdelär.

Qısqası, tabiplar, mullalar, ğalimnär qatnaşqan bu cıyılış bik faydalı buldı. Qızğanıç, küpläp araqı eçüçelär, narkotik qullanuçılar mondıy cirgä siräk yöri.



Albina Zäynulla, Qazan.

XS
SM
MD
LG