Bögelmädä, 3nçe martta, ütkän qorıltaynı «Tatarstan - yaña ğasır» xäräkäteneñ yäşlär qanatı oyıştırdı. Qazan yäşläre respublikanıñ Könyaq-Könçığışında yäşägän yäşlärne bergä ciep, alarnı saylawlarda qatnaşırğa çaqırdı. Çara «Inçe yäşlär forumı» digän isem astında ütte. Bögelmä, Yutazı, Bawlı, Çallı, Älmättän kilgän yegetlär-qızlar aldında deputatlıqqa nämzätlär çığış yasadı. Forumnıñ plenar utırışı başlanğançı, ike seksiä eşläde. Berse - «yäşlär häm saylawlar», ikençese – «21nçe ğasırda yäşlär» digän isemnär astında ütte. Qazan delegatsiäse yulda soñarıp kilgänlektän, seksiä eşlärendä yäşlär üzläre çığış yasap ölgermäde. Ölkännärne genä tıñladı.
Gomumän äytkändä, forumnar häm plenar utırışlar xäzer ciñelçä genä ütä. Ozın-ozın notıqlar söylänmi, qısqa häm iğtibarnı cälep itärlek çığışlar, cırlar belän arılıştırıp bara. Bu yulı da şulay buldı. «Tatarstan -yaña ğasır» xäräkäteneñ yäş citäkçeläre yäşlärne iñ kimendä saylawlarğa barırğa, häm anda inde bilgele firqäğä tawış birerğä çaqırdı.
«Tatarstan- yaña ğasır» xäräkäte yulbaşçısı häm «Berdäm Rusiä» firqäseneñ Tatarstan bülege citäkçese Färit Möxämmätşin da yegetlärneñ häm qızlarnıñ iğtibarın cälep itärgä tırıştı. Ul üzeneñ çığışında, Tatarstan parlamentı qarşında yäşlär ictimaği palatasın buldıraçaqbız, dip wäğdä birde. Älege forumda, şulay uq, «Tatarstan- yaña ğasır» xäräkäte buldırğan «Yäşlär qazanışı» digän büläk tapşırdı.
Yäşlär belän eşlägän awıl, rayon ictimaği üzäkläre öçen andıy iğtibar qäderle ide. Andıy citäkçelärne yäşlär üzläre dä alqışlar belän sälämläde.
Oyıştıruçılar «Yäşlärgä iğtibar kürsätkän öçen» dip Tatarstan Prezidentına da büläk birergä teläde. Läkin anıñ Bögelmädä bulmaw säbäple, ul Qazanda, xakimiät firqäse ütkärgän çarada tapşırıldı.
Bikä Timerova
