Accessibility links

пәнҗешәмбе, 8 декабрь 2016, Казан вакыты 15:07

Gretsiädä parlament saylawları


Bu saylawlar Gretsiädä 1974 yılda xärbi xakimiät çorı tämamlanğannan soñğı iñ möhim saylawlar dip qarala. Töp köräş soñğı berniçä distä yılda xakimiättä bulğan ike säyäsi dinastiä arasında bara. Sul yaqta elekke premyer ministrlarnıñ onığı häm ulı George Papandreou citäkçelegendäge Sotsialist Xäräkät. Bu xäräkät 1993-nçe yıldan birle inde rättän 3 märtäbä saylawlarda ciñep kilde. Uñ yaqta Gretsiäne xärbi diktaturadan alıp çıqqan premyer ministr Konstantin Karamanlis tuğanınıñ ulı konservativ Costas Karamanlis citäkçelegendäge Yaña Demokratiä partiäse. Şul 2 citäkçeneñ berse premyer-ministr bulaçaq. Karamanlis bu saylawlarnı demokratiä bäyräme dip atadı:

AUDİO: Bügen Demokratiä bäyräme. Watandaşlar ilneñ bügengese häm kiläçäge öçen tawış birä.

Papandreou da üz xäräkäteneñ ciñep çığaçağına ışanıp tawış birgändä bolay dide:

AUDİO: Böten Gretsiädän bik uñay xäbär kilä. Bezne optimistik näticälär kötä.

Ämma ciñüçelärne yaqın kiläçäktä bik zur eş tä kötä. 13-29-nçı avgustlarda Afinda ütäçäk cäyge olimpiä uyınnarına äzerlek eşläre waqıt qısalarınnan bik artta qalğan. Törle qurqınıçlarğa qarşı 800 million dollarlıq iminlek çeltären buldırırğa kiräk. 13-nçe Avgustta açılaçaq Olimpiä uyınnarına 5 ay çaması waqıt qalıp barğanda, Olimpiä qorılmalarınıñ äle yartısı da tözelmägän. Äle töp Olimpiä stadionı da yuq. 2000-nçı yılğı Olimpiä uyınnarın ütkärgän Sidney töp binalar tözeleşen 1 yıl aldan tämamlap quyğan ide. 2 atna elek ütkärelgän soñğı fiker beleşü näticäläre konservativlarnıñ 5 protsent kübräk tawış belän ciñep çığu mömkinlegen kürsätte. Ämma säyäsi analitiklar fikerençä, şunnan soñğı könnärdä bu ayırma bik nıq kimep 1-2 genä protsentqa qalğan bulırğa mömkin. Xäzer küp kenä analitiklar fikerençä saylawlar näticälären ütä uñçı häm ütä sulçı partiälär xäl itäçäk. Ciñü alarnıñ bu ike töp partiädän tawışlarnıñ niqädär öleşen ala aluına yäki ala almawına bäyle bulaçaq.

Naif Aqmal, Praga.
XS
SM
MD
LG