Accessibility links

якшәмбе, 4 декабрь 2016, Казан вакыты 23:24

Gretsiädä xakimiätkä Yaña Demokratia kilde


Yäkşämbedä Gretsiädä parlament saylawları ütte. Töp köräş ike säyäsi dinastiä arasında, distä yıl xakimiättä torğan sotsialistlar belän konservativ yaña demokratlar arasında bardı. Bu yulı ciñüne yaña demokratlar yawladı. Yaña Demokratiä partiäse citäkçese, ilneñ kiläse premier-ministrı bulaçaq Costas Karamanlis iqtisadta üzgäreşlär başqarırğa häm dä bu cäydä Gretsiädä ütäçäk Olimpiä uyınnarın iñ imin uyınnar itergä wäğdä itte.

Audio

Grek saylawçıları yaña demokratlarnıñ ciñüwen menä şulay bäyräm itte, xörmätle tıñlawçılar. Şulay itep, qısqa ber däwerne sanamağnda, il belän 23 yıl idarä itkän sotsialistar xakimittän kitä. Sotsialistlarnıñ citäkçese, elekke premier-ministr George Papandreu räsmi näticälärne kötep tormıyça, ciñelüen tanıdı:

Audio (George Papandreu)

"Min Karamanlis äfändegä yaña wazifasında, bar Gretsiä faydasına uñışlar telim. Ozaq yıllar xakimiättä torğannan soñ bezneñ partiä äle dä köçle bulıp qala. Bez yañaru häm täräqqiät yulınanna barunı däwam itäçäkbez."

Papandreu da, Karamanlis ta, Gretisädä menä inde yartı ğasır ber-ber artlı idarä itep kilgän ike säyäsi dinastiä wäkilläre. Papandreunıñ ätise häm babası, ä Karamanlisnıñ abıysı üz waqıtında premier-ministr buldılar. İlneñ yaña premier-ministrı bulaçaq Costas Karamanlis saylaw näticälären xalıqnıñ üzgäreşlär teläwe belän añlattı:

Audio (Costas Karamanlis)

"Bügen üz tawışlarığız belän sez ildä säyäsi üzgäreşlär, yaña çorda yaña säyäsät kürü telägen belderdegez."

Yaña demokratlar Parlamenttağı 300 urınnıñ 165-en alır dip kötelä. Karamanlis Gretsiädä iqtisadi üzgäreşlär başqarırğa, çit il investitsiäläre cälep itergä, eşsezlek belän kräşergä wäğdä itte. Xäzerge waqıtta eşsezlek 10 protsent çaması.

Yaña xökümät aldında torğan töp mäsälälärneñ berse – şuşı yılnıñ avgustında Gretsiädä ütäçäk Olimpiä uyınnarı. Bügenge köngä 39 obyektnıñ ni barı 15-e tözelep betkän. Uyınnarğa 5 ay qalıp bara, älegä töp stadion da äzer tügel. Xäyer, Karamanlis, bar eşlärne waqıtında tämamlap, uyınnarı iñ yuğarı däräcädä ütkärergä, alay ğına tügel, dönyada barğan terrorğa qarşı suğışnı istä totıp, bu uyınnarnı iñ imin uyınnar itergä wäğdä itä. Uyınnar uñışıı ütsä, bu – yaña xökümät öçen citdi qazanış bulaçaq.

Olimpiadağa qädär yaña citäkçe aldında tışqı säyäsättä torğan tağın ber mäsälä bar, ul da bulsa, Kipr utrawı mäsäläsen xäl itüdä yärdäm itü. Tağın 7 atnadan, 1 Mayda Kipr Yevropa Berlegenä quşıla. Dönya cämäğätçelege, Berläşkän Millätlär general sekertare Kofi Annan, grek häm törek öleşlärenä bülengän bu utrawnı urtaq xökümätle ber däwlät itergä tırışa. Älegä bu söylöşülär awır bara. Costas Karamanlis beryaqtan Kipr greklarına basım yasap, ikençe yaqtan Törkiä belän söyläşülär ütkärep şuşı täräqqiätkä öleş kertä ala. Ägär inde grek diplomatiäse uñışqa ireşmäsä, bu – yaña xökümätneñ berençe ciñelüwe bularaq qabul iteläçäk.

Ali Gilmi, Praga
XS
SM
MD
LG